پورے ملک اچ عیدالاضحیٰ دے ݙوڄھے ݙینھ وی قربانی دا سلسلہ جاری

اسلام آباد۔28 مئی(اے پی پی)ملک بھر اچ عیدالاضحیٰ دے ݙوڄھے ݙینھ وی جانوراں دی قربانی دا سلسلہ جاری اے، سنتِ ابراہیمی دی پیروی کریندے ہوئیں جانوراں دی قربانی دا اے سلسلہ جمعہ تئیں جاری رہسی۔ عید دے ݙوینھ وی دعوتاں، ٻیٹھکاں، کھابے، ہلا گلہ اتے سیرو تفریح چلدی رہی۔ گھراں اچ ونکو ونک دے کھاوݨے پکدے پئن اتے ہک ٻعے دے گھر دعوتاں تھیندیاں پئن، ٻال ٻلوڑے کھاوݨ پیوݨ اتے عیدی ولھیٹݨ اچ ردھے ہوئن اتے ݙاݙھے خوش ہین۔ ایں توں پہلے عید الاضحیٰ دے پہلے ݙینھ فرزندانِ توحید دی وݙی تعداد سنتِ ابراہیمی دی پیروی اچ جانوراں دی قربانی کیتی، قربانی توں فارغ تھی تے شہری اپݨے عزیز و اقارب اتے غریباں اچ گوشت ونڈݨ کیتے نکلین۔ عید دے ݙوڄھے ݙینھ وی قربانی تھیندی پئی اے ڄݙآں جو قربانی توں فارغ تھیوݨ آلے سیر سپاٹے کیتے نکلیے ہوئن۔ اسلام آباد اچ پارکاں اتے تفریح گاہیں تے صرف فیملیز کوں ونجݨ دی اجازت اے اتے چھڑیاں کوں اجازت نئیں جو او پارکاں دا رخ کرن، ایں سانڳے پولیس اتے ٹریفک اہلکاراں دی وݙی نفری امن و امان اتے پارکاں دی سیکورٹی کیتے موجود اے تاں جو کوئی ناخوشگوار واقعہ نا تھیوے۔ ݙوڄھے پاسو ماہرینِ صحت عیدِ قرباں تے مزے مزے دے کھاݨیاں تے ہتھ ذرا ہولا رکھݨ تے زور ݙتے۔ ماہرینِ صحت دا آکھݨ اے جو شوگر، بلڈ پریشر، کولیسٹرول اتے دل دے مریض خصوصی احتیاط کرن، کلیجی، گردے، مغز اتے پاوے کھاوݨ توں تھوڑا پرہیز کرن اتے گھیو، تیل اتے تیز مسالیاں توں ہتھ چھک ڳھنن۔