یومِ تکبیر ہک تاریخی ݙینھ، پاکستان عالمی دباؤ دے باوجود پاکستان دے دفاع و خودمختاری کوں اڳونہا رکھیے، عطاء اللہ تارڑ

اسلام آباد۔ 28 مئی(اے پی پی)وفاقی وزیرِ اطلاعات و نشریات عطاء اللہ تارڑ یومِ تکبیر تے قوم کوں مبارکباد ݙیندے ہوئیں آکھیے جو اے او تاریخی ݙینھ ہا جݙاں قائد محمد نواز شریف عالمی دباؤ، معاشی پابندیاں اتے دھمکیاں دے باوجود پاکستان دے دفاع تے خودمختاری کوں ترجیح ݙتی۔ سماجی رابطے دے پلیٹ فارم ”ایکس“ تے اپݨی ہک پوسٹ اچ وفاقی وزیرِ اطلاعات آکھیا جݙاں یومِ تکبیر آندے تاں میݙے ݙاݙا مرحوم صدر محمد رفیق تارڑ دیاں او ڳالھیں یاد آندن جݙاں او 28 مئی 1998ء کوں اکھیں اچ خوشی دے ہنجھواں نال اے آہدے پئے ہن جو ’’اڄ پاکستان اپݨے دفاع، وقار اتے آزادی کوں ہمیشہ کیتے محفوظ ٻݨا ڳھدے۔‘‘ اے او تاریخی ݙینھ ہا جݙاں قائد میاں محمد نواز شریف عالمی دباؤ، معاشی پابندیاں اتے دھمکیاں دے باوجود پاکستان دے دفاع اتے خودمختاری کوں ترجیح ݙتی۔ وفاقی وزیر آکھیا جو اڄ دے ݙینھ اساں پاکستان دے ایٹمی پروگرام کیتے شہید ذوالفقار علی بھٹو، ڈاکٹر عبدالقدیر خان مرحوم تے ڈاکٹر ثمر مبارک مند ڄھئیں اپݨے عظیم سائنسداناں، انجینئرز، افواجِ پاکستان دے کردار کوں سلام پیش کریندے ہیں۔