پاکستان دا اقوامِ متحدہ دے امن مشنز دے اہلکاراں، پاکستانی “بلیو ہیلمٹس” کوں شاندار خراجِ تحسین

راولپنڈی۔ 29 مئی(اے پی پی)بین الاقوامی یومِ اقوامِ متحدہ امن دستے 2026 دے موقعے تے پاکستان عالمی امن دے قیام کیتے خدمات انجام ݙیوݨ والے اقوامِ متحدہ دے امن مشنز دے اہلکاراں، خاص طور تے پاکستانی “بلیو ہیلمٹس” کوں شاندار خراجِ تحسین پیش کیتے۔ پاک فوج دے شعبہ تعلقاتِ عامہ (آئی ایس پی آر) دے مطابق پاکستان پچھلے چھی ݙاھاکیاں توں ودھ عرصے توں اقوامِ متحدہ دے امن مشنز اچ بھرپور کردار ادا کریندا پئے، جیہڑا عالمی امن اتے استحکام کیتے اوندے غیر متزلزل عزم دا پکا ثبوت اے۔ آئی ایس پی آر توں جاری تھیوݨ والے بیان دے مطابق 1960 توں ہݨ تئیں 2 لکھ 37 ہزار توں ودھ پاکستانی امن دستیاں دے اہلکار ڄڳ اچ اقوامِ متحدہ دے مختلف مشنز اچ خدمات انجام دے چکن، ڄݙاں جو 183 پاکستانی اہلکار عالمی امن دے قیام دیاں کوششاں اچ اپݨیاں جاناں دا نذرانہ پیش کر چکن۔ بیان موجب ایں ویلھے پاکستانی امن دستے جمہوریہ کانگو (MONUSCO)، جنوبی سوڈان (UNMISS) اتے وسطی افریقی جمہوریہ (MINUSCA) سودھا مختلف خطرناک علاقیاں اچ تعینات ہن، جتھاں او عسکری کارروائیاں دے نال نال موسمیاتی تبدیلیاں توں پیدا تھیوݨ والے چیلنجز نال نمٹݨ کیتے وی خدمات سرانجام ڈیندے پئن۔ آئی ایس پی آر دے مطابق اجکل دے جنگی حالات پہلے دے مقابلے اچ زیادہ پیچیدہ، غیر مستحکم اتے غیر متوازن تھی چکن، جتھاں امن دستیاں کوں سائبر سکیورٹی خطرات، ڈیجیٹل گمراہ کن مہمات، سیاسی تقسیم اتے موسمیاتی بحران جھیں نویں چیلنجز دا سامݨا اے۔ بیان موجب اقوامِ متحدہ دے امن دستیاں دے عالمی ڈینھ 2026 دا موضوع “امن اچ سرمایہ کاری” ایں گالھ دی عکاسی کریندے جو دنیا کوں صرف تنازعات دے ردِعمل تئیں محدود رہݨ دی بجائے مستقل اتے پائیدار امن دے قیام کیتے پہلے توں اقدامات کرݨے ہوسن۔ آئی ایس پی آر دے مطابق موجودہ دور اچ “امن اچ سرمایہ کاری” کیتے جدید انٹیلی جنس نظام، شہریاں دے تحفظ دے مؤثر انتظامات اتے موسمیاتی تبدیلیاں نال ہم آہنگ آپریشنل فریم ورک ٻہوں ضروری ہن تاں جو کمزور آبادیاں کوں مؤثر تحفظ ݙتا ونڄ سڳے۔ بیان موجب حکومتِ پاکستان اتے مسلح افواج اقوامِ متحدہ دے امن مشنز دے مقاصد اتے اصولاں نال اپݨی غیر متزلزل وابستگی دا اعادہ کریندن، جیندے تحت انسانی وسائل، جدید تربیتی سہولیات اتے ادارہ جاتی استعدادِ کار اچ سرمایہ کاری جاری رکھی ویسی۔ آئی ایس پی آر آکھیا جو پاکستان اقوامِ متحدہ دے مونݙھے نال مونݙھا رلا تے کھڑے اتے عالمی برادری کوں اے سنیہا ݙیندے جو پائیدار امن آپو آپ قائم نہیں تھیندا ٻھل اوندے کیتے مسلسل اجتماعی کوششاں اتے سرمایہ کاری دی لوڑھ پوندی اے۔ پاکستان عالمی استحکام، سلامتی اتے انسانی ہمدردی دی بنیاد تے اقوامِ متحدہ دے پرچم ہیٹھ اپݨا کردار جاری رکھݨ دا عزم وی دوہرایا۔