فتنہ الہندوستان دی دہشتگرد شہناز توں اہلخانہ دا مکمل لاتعلقی دا اعلان

اسلام آباد۔30 مئی (اے پی پی)فتنہ الہندوستان دی دہشت گرد شہناز توں اہلخانہ مکمل لاتعلقی دا اعلان کیتے۔ بلوچستان اچ سرگرم بھارتی پراکسی اتے کالعدم تنظیم فتنہ الہندوستان دے دہشت گرداں توں انہاں دے اہلخانہ وی لاتعلقی اختیار کرݨ لڳ ڳئن۔ تربت نال تعلق رکھݨ والی فتنہ الہندوستان دی دہشت گرد شہناز توں اوندے اہلخانہ اتے رشتہ داراں مکمل لاتعلقی دا اعلان کر ݙتے۔ فتنہ الہندوستان دی دہشت گرد شہناز دی اماں رخسانہ، ݙاݙا اتے ماموں تربت پریس کلب اچ ݙسایا جو شہناز ڳھٹ عمر اچ ہی عمان لڳی ڳئی ہئی اے 12 سالاں توں ساݙا اوندے نال کوئی رابطہ نا ہئی۔ شہناز دی اماں آکھیا جو شہناز 9 مہینے دی ہئی جو اوندے ابو فوت تھی ڳئے ہن، خاندان کوں کݙاھیں وی اوندی کہیں شدت پسند سرگرمی یا کہیں کالعدم تنظیم نال رابطیاں دے حوالے نال کؤی معلومات کائنا ہن۔ شہناز دے چاچے اتے ٻئے رشتہ داراں آکھیا جو ساݙے خاندان دا اوندے کہیں قول، فعل یا سرگرمی نال کوئی تعلق کائنی۔ رشتہ داراں آکھیا جو اساں اتے ساݙا خاندان پرامن پاکستانی ہیں، اساں ہمیشہ قانون اتے ریاستی اداریاں دا احترام کریندے آئے ہیں‌۔ فتنہ الہندوستان دی دہشت گرد شہناز دے اہلخانہ اتے رشتہ داراں دا اے لاتعلقی دا اعلان واضح کریندے جو بلوچ قوم دہشت گردی دے ناسور توں تنگ آ چُکی اے۔