اوول دے ہیرو فضل محمود کوں مداحواں توں وچھڑے 21 سال گذر ڳئن

اسلام آباد۔ 30 مئی(اے پی پی)اوول دے ہیرو فضل محمود کوں مداحاں توں وچھڑیاں 21 سال گذر ڳئن۔ فضل محمود پاکستانی ٹیم کوں ٹیسٹ نیشن ٻݨواوݨ اچ اہم کردار ادا کیتا۔ فضل محمود 18 فروری 1920 کوں لاہور اچ ڄمیے ہن۔ متحدہ ہندوستان اچ رانجی ٹرافی اچ حصہ گھن تے فرسٹ کلاس کرکٹ شروع کیتی۔ 1946 اچ ڄݙاں قائد اعظم اسلامیہ کالج لاہور آئے تاں فضل محمود نال انہاں دا تعارف تھیا، قائد اعظم انہاں دی کرکٹ دی کارکردگی سݨ تے ٻہوں خوش تھئے اتے آکھیا “کیپ اٹ اپ ینگ مین۔”

فضل محمود قیامِ پاکستان توں بعد اکتوبر 1952 اچ بھارت دے خلاف اپݨا کیریئر شروع کیتا۔ فضل محمود انگلینڈ دے خلاف اوول ٹیسٹ اچ 99 رنز ݙے تے 12 کھݙاریاں کوں آؤٹ کر تے پاکستان کوں پہلی یادگار فتح ݙیوائی۔ 1955 اچ انہاں کوں “وزڈن کرکٹر آف دی ایئر” دا خطاب ݙتا ڳیا۔ انہاں اگست 1962 اچ انگلستان دے خلاف آخری ٹیسٹ میچ کھیݙ تے کرکٹ کوں الوداع آکھیا۔ فضل محمود دی اڳونہی کارکردگی تے حکومت پاکستان تمغہ حسن کارکردگی اتے ہلالِ امتیاز ݙتے۔ او 30 مئی 2003 کوں فوت تھئے۔ اکتوبر 2021 اچ پاکستان کرکٹ بورڈ انہاں دا ناں “ہال آف دی فیم” لسٹ اچ شامل کیتا۔