ݙو سو یونٹ استعمال کرݨ والے صارفین دی سبسڈی جاری رہسی: وزیر توانائی دا اعلان

اسلام آباد۔31 مئی(اے پی پی)وفاقی وزیر توانائی اویس لغاری آکھیے جو 200 یونٹ استعمال کرݨ والے صارفین دی سبسڈی جاری رہسی۔ وفاقی دارالحکومت اچ میڈیا نال الیندے انہاں دا آکھݨ ہئی جو ݙو سو توں گھٹ یونٹ صارفین کوں سبسڈی ݙتی ویندی پئی اے، سبسڈی دے تحت ہک خاص رقم ٻلاں اچ جمع تھیندی پئی اے، 200 یونٹ استعمال کرݨ والے صارفین دی تعداد 2 کروڑ توں ودھ چکی اے، سبسڈی حاصل کرݨ والے صارفین بلاں تے آوݨ آلے کیو آر کوڈ کوں سکین کرن جو انہاں کوں فیدہ تھیوے۔ وفاقی وزیر توانائی دا آکھݨ ہئی جو حق دار صارفین کوں سبسڈی ݙیوݨ جاری رکھسوں۔ اویس لغاری آکھیے جو پچھلے ݙو سالاں توں بجلی دی قیمت اچ کمی آئی اے، حکومت 780 ارب دا گردشی قرضہ گھٹ کیتے، بجلی دی پیدوار کیتے مقامی ذرائع تے انحصار ودھدا پئے۔ انہاں دا آکھݨ ہئی جو 20 لکھ لوکاں دے شناختی کارڈ دے ذریعے بجلی میٹر کوں لنک کیتا ڳئے، پروٹیکٹڈ صارفین دی سبسڈی ختم کرݨ دیاں خبراں حقائق دے منافی ہن۔ وفاقی وزیر توانائی آکھیے جو شعبہ توانائی اچ اصلاحات توں مثبت نتائج سامنے آندے پئن، گھریلو صارفین دے بلاں اچ 16 فیصد اتے پروٹیکٹڈ صارفین دے بلاں اچ 31 فیصد کمی کیتی اے، مجموعی طور تے زرعی تے گھریلو صارفین کوں 527 ارب دی سبسڈی ݙتی ویندی پئی اے۔ اویس لغاری دا آکھݨ ہئی جو بجلی بلاں تے ٹیکسز دی کوئی تجویز زیر غور کینی۔