پاکستان تے یورپی یونین دا ݙوطرفہ تعلقات کوں جامع تے سانجھے مفاد تے مبنی شراکت داری اچ تبدیل کرݨ دے عزم دا اعادہ، نائب وزیراعظم محمد اسحاق ڈار دی نائب صدر یورپی کمیشن کاجا کالس دے رلے سانجھی پریس کانفرنس

اسلام آباد۔ 1 جون (اے پی پی) پاکستان تے یورپی یونین اتھاں منعقدہ اٹھویں پاکستان-یورپی یونین سٹریٹجک ڈائیلاگ دے دوران تعاون دے وݙے امکانات کوں اجاگر کریندے ݙوطرفہ تعلقات کوں ہک جامع تے سانجھے مفاد تے مبنی شراکت داری اچ تبدیل کرݨ دے عزم دا اعادہ کیتے۔ نائب وزیراعظم تے وزیرِخارجہ سینیٹر محمد اسحاق ڈار یورپی یونین دی اعلیٰ نمائندہ خارجہ امور و سلامتی پالیسی/نائب صدر یورپی کمیشن کاجا کالس دے رلے مشترکہ پریس کانفرنس توں خطاب کریندے ایں مذاکراتی عمل کوں پاکستان تے یورپی یونین وچال اعلیٰ ترین ادارہ جاتی فورم قرار ݙتے۔ انہاں آکھیا جو گزریل ستواں جائزہ اجلاس نومبر اچ برسلز اچ منعقد تھیا ہئی جیڑھا ݙوہیں فریقین وچال ایں نوعیت دے رابطے دی تاریخ اچ ساریں توں گھٹ وقفے دے بعد تھیوݨ آلا اجلاس ہئی۔ ݙوائیں فریقین پاکستان-یورپی یونین سٹریٹجک انگیجمنٹ پلان 2019 دے تحت تعاون تے پیشرفت دا جائزہ ڳھدا جیندے اچ تجارت، سرمایہ کاری تے ترقی، انسانی حقوق تے قانون دی حکمرانی، ہجرت تے نقل و حرکت، جیڑھےجو سلامتی تے انسدادِ دہشت گردی جیھے شعبے شامل ہن۔محمد اسحاق ڈار آکھیا جو یورپی یونین پاکستان دے وݙے تجارتی شراکت داراں اچ شامل اے تے جی ایس پی پلس فریم ورک دے تحت پاکستان تے یورپی یونین وچال تجارتی تعاون کوں ݙوہیں فریقین کیتے سود مند قرار ݙتا۔ انہاں ݙسایا جو مذاکرات اچ ݙوطرفہ تجارت تے سرمایہ کاری دے تعلقات کوں مزید مضبوط بݨاوݨ تے وی توجہ ݙتی ڳئی۔ نائب وزیراعظم محمد اسحاق ڈار تے یورپی یونین دی اعلیٰ نمائندہ علاقائی تے عالمی امور تے وی تفصیلی ڳالھ مہاڑ کیتی جنہاں اچ امریکہ-ایران جھیڑا، جنوبی ایشیا دی سلامتی دی صورتحال، افغانستان، یورپ تے مشرقِ وسطیٰ شامل ہن۔ محمد اسحاق ڈار امریکہ تے ایران وچال کشیدگی گھٹ کرݨ کیتے پاکستان دی ثالثی کوششاں دی تعریف کرݨ تے معاون کردار ادا کرݨ تے یورپی یونین دا شکریہ ادا کیتا۔ انہاں بھارت دی بلااشتعال جارحیت تے تشویش دا اظہار کریندے مسئلہ جموں و کشمیر تے پاکستان دے اصولی مؤقف دا اعادہ کیتا تے آکھیا جو ایں جھیڑے دا حل کشمیری عوام دی خواہشات تے اقوامِ متحدہ دی سلامتی کونسل دی قرارداداں دے مطابق تھیوݨا چاہیدے۔ انہاں اے وی آکھیا جو سندھ طاس معاہدے متعلق پاکستان دا مؤقف ثالثی عدالت دے اضافی فیصلے دے بعد درست ثابت تھیا جیندے اچ واضح کیتا ڳیا جو معاہدہ مغربی دریاواں تے بھارت دے آبی کنٹرول دی صلاحیت تے بنیادی حدود عائد کریندے۔سلامتی دے امور تے محمد اسحاق ڈار افغان سرزمین تے فتنہ الخوارج تے فتنہ ہندوستان دے عناصر دی موجودگی تے پاکستان دے خلاف انہاں دے مسلسل حملیں تے تشویش ظاہر کیتی۔ انہاں کثیرالجہتی نظام کوں مضبوط بݨاوݨ تے اقوامِ متحدہ دے منشور تے عملدرآمد دی لوڑھ تے زور ݙتا۔ اپݨے خطاب اچ یورپی یونین دی اعلیٰ نمائندہ کاجا کالس پاکستان کوں ہک اہم علاقائی طاقت تے یورپی یونین دا اہم شراکت دار قرار ݙتا۔ انہاں آکھیا جو یورپی یونین پاکستان دی ساریں توں وݙی برآمدی منڈی اے تے پاکستان یورپی یونین دے جی ایس پی پلس پروگرام توں ساریں توں ودھ فیدہ چاوݨ آلا ملک اے۔ کاجا کالس امریکہ تے ایران وچال پاکستان دی ثالثی کوششاں دی تعریف کریندے آکھیے انہاں اقدامات مکمل جنگ دے خدشے کوں ٹالݨ اچ مدد ݙتی اے۔ انہاں آکھیا جو یورپی یونین ہک پائیدار تے پرامن حل کیتے اپݨا کردار ادا کرݨ کیتے تیار اے۔ افغانستان دی صورتحال دے حوالے نال انہاں آکھیا جو پاکستان کوں بین الاقوامی قانون موجب اپݨے عوام تے اپݨی سرزمین دے دفاع دا حق حاصل اے۔ ݙوہیں رہنماواں تجارت، موسمیاتی تبدیلی نال نبٹݨ دی صلاحیت، ڈیجیٹل انفراسٹرکچر، صاف توانائی، ہجرت، نقل و حرکت تے عوامی رابطے، بالخصوص ایراسمس منڈس سکالرشپ پروگرام دے ذریعے پاکستان تے یورپی یونین دے تعلقات کوں مزید تکڑابݨاوݨ دے عزم دا اظہار کیتا۔