عوام کوں بہترین، محفوظ، آرام دہ تے وقتی سفری سہولتاں ݙیوݨ پاکستان ریلویز دی اولین ترجیح اے، محمد حنیف عباسی

اسلام آباد۔ 1 جون (اے پی پی) وفاقی وزیر ریلوے محمد حنیف عباسی آکھیے جو عوام کوں بہترین، محفوظ، آرام دہ تے وقتی سفری سہولتاں ݙیوݨ پاکستان ریلویز دی اولین ترجیح اے جݙاں جو ریلوے نظام کوں جدید، مؤثر تے عوامی ضرورتاں نال ہم آہنگ بݨاوݨ کیتے سارے دستیاب وسائل بروئے کار آندے ویسن۔ وزارتِ ریلوے دے میڈیا آفس موجب وفاقی وزیر دی زیرِ صدارت پاکستان ریلویز اچ ہک اہم اجلاس منعقد تھیا جیندے اچ ریلوے آپریشنز، جاری اصلاحاتی اقدامات تے ادارے دی مجموعی کارکردگی دا تفصیلی جائزہ ڳھدا ڳیا۔ اجلاس اچ ریلوے دے مختلف شعبہ جات دی کارکردگی تے متعلقہ افسران بریفنگ ݙتی جݙاں جو ریلوے آپریشنز کوں مزید فعال، منظم تے مؤثر بݨاوݨ متعلق مختلف امور تے تفصیلی غور کیتا ڳیا۔ ایں موقع تے مسافراں دی سہولت، سفر دے معیار اچ بہتری تے ریلوے خدمات کوں جدید تقاضیں نال ہم آہنگ بݨاوݨ کیتے مختلف تجویزاں دا وی جائزہ ڳھدا ڳیا۔اجلاس اچ پاکستان ریلویز دی استعدادِ کار اچ ودھارے دے مختلف پہلواں، جاری ترقیاتی منصوبیاں تے مستقبل دے منصوبیں تے پیشرفت دا جائزہ وی ڳھدا ڳیا۔ وفاقی وزیر متعلقہ افسراں کوں ہدایت کیتی جو جاری منصوبیں دی رفتار تکھی کیتی ونڄے تے مقررہ اہداف کوں وقتی مکمل کیتا ونڄے۔ محمد حنیف عباسی ادارے دی کارکردگی اچ مسلسل بہتری دی لوڑھ تے زور ݙیندے آکھیا جو ریلوے نظام کوں جدید، مؤثر تے عوامی ضرورتاں موجب بݨاوݨ کیتے سارے دستیاب وسائل بروئے کار آندے ویسن۔ انہاں افسران کوں کارکردگی مزید بہتر بݨاوݨ تے عوامی شکایتاں دے فوری ازالے کیتے مؤثر اقدامات دی ہدایت وی کیتی۔ اجلاس اچ انتظامی، آپریشنل تے ترقیاتی امور تے تفصیلی ڳالھ مہاڑ کیتی ڳئی جݙاں جو وفاقی وزیر ریلوے عوام دوست تے مؤثر ریلوے نظام دے قیام دے عزم دا اعادہ کریندے آکھیا جو پاکستان ریلویز دی بہتری تے مسافراں دی سہولت کیتے ہر ممکن اقدام کیتا ویسی۔