بجٹ دا وݙا حصہ قرضیں دی ادائیگی تے خرچ تھیوݨ پاروں ترقیاتی منصوبے متاثر تھیندے پئن، وفاقی وزیراحسن اقبال دا سالانہ پلان کوآرڈینیشن کمیٹی دے اجلاس توں خطاب

اسلام آباد۔ 1 جون (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو بجٹ دا وݙا حصہ قرضیں دی ادائیگی تے خرچ تھیوݨ پاروں ترقیاتی منصوبے متاثر تھیندے پئن تاں جو حکومت محدود وسائل دے باوجود قومی اہمیت دے حامل منصوبیں دی تکمیل کیتے پرعزم اے۔ سالانہ پلان کوآرڈینیشن کمیٹی دے اجلاس توں خطاب کریندے انہاں آکھیا جو گزریل اٹھ سالاں توں وفاقی ترقیاتی بجٹ تقریباً ہک ہزار ارب روپے دی سطح تے جمود دا شکار اے جݙاں جو ایں عرصے اچ صوبیں دا ترقیاتی بجٹ ہک ہزار ارب روپے توں ودھ تے 2869 ارب روپے تئیں پڄ چکے جیندے پاروں وفاق تے صوبیں دے ترقیاتی اخراجات اچ نمایاں فرق پیدا تھی ڳئے۔احسن اقبال ݙسایا جو ترقیاتی منصوبیں دی مجموعی لاڳت تے تھرو فارورڈ ودھ تے 10 ہزار 818 ارب روپے تئیں پڄ چکے۔ آندے مالی سال 2026-27 کیتے 1126 ارب روپے دے ترقیاتی پروگرام دی تجویز ݙتی ڳئی اے۔ وزارتاں جاری تے نویں منصوبیں کیتے مجموعی طور تے 4097 ارب روپے دی طلب پیش کیتی اے تاں جو محدود وسائل پاروں تقریباً 3000 ارب روپے دی اضافی طلب پوری کرݨ ممکن کائنی۔ انہاں آکھیا جو حکومت دی کوشش اے جو دستیاب وسائل کوں دانشمندی استعمال کریندے اعلیٰ ترجیحی منصوبیں تے توجہ مرکوز رکھی ونڄے۔ بلوچستان دے ترقیاتی منصوبیں کوں خصوصی اہمیت ݙتی ویندی پئی اے تے این-25 (پاکستان ایکسپریس وے) کیتے 125 ارب روپے مختص کرݨ دی سفارش کیتی ڳئی اے۔وفاقی وزیر ݙسایا جو حکومت اپݨی اتحادی جماعتاں دے ترقیاتی منصوبیں کیتے 87 ارب روپے مختص کریسی جݙاں جو آزاد جموں و کشمیر، گلگت بلتستان تے ضم شدہ اضلاع کیتے 153 ارب روپے رکھݨ دی تجویز ݙتی ڳئی اے۔ انہاں آکھیا جو وفاق این ایف سی اچ اپݨے 40 فیصد حصے توں آزاد جموں و کشمیر تے گلگت بلتستان کوں مالی معاونت ݙیسی۔ احسن اقبال آکھیا جو پاکستان کوں معاشی استحکام دی طرف گھن ونڄݨ کیتے مستحکم، متوازن تے پائیدار ترقی دا رستہ اختیار کرݨا ہوسی۔ انھاں دے مطابق برآمدات اچ ودھارے دے بغیر بلند تے دیرپا معاشی ترقی ممکن کائنی۔ انہاں آکھیا جو وزیراعظم شہباز شریف ایجھی ترقی چاہندن جیڑھی پائیدار ہووے تے جیندے ثمرات عوام تئیں پڄن۔ انہاں ݙسایا جو زراعت دے شعبے اچ اصلاحات تے پیداوار اچ ودھارے تے خصوصی توجہ ݙتی ویندی پئی اے جݙاں جو جدید ٹیکنالوجی، صنعت تے برآمدات دے ودھارے کوں قومی ترقی دی حکمتِ عملی دا اہم حصہ بݨایا ڳئے۔