وفاقی کابینہ دوائیں تے ٹریک اینڈ ٹریس سسٹم دے نفاذ دی باضابطہ منظوری ݙے ݙتی اے، ہر دوا کوں ڈیجیٹل طریقے نال ٹریک تے ویریفائی کیتا ونڃ سڳسی، وفاقی وزیرِ صحت

اسلام آباد۔ 2 جون (اے پی پی) وفاقی وزیرِ صحت مصطفیٰ کمال آکھیے جو وفاقی کابینہ ملک اچ دوائیں تے ٹریک اینڈ ٹریس سسٹم دے نفاذ دی باضابطہ منظوری ݙے ݙتی اے۔ ایں سلسلے اچ ڈرگ لیبلنگ اینڈ پیکنگ رولز 1978 اچ ضروری ترامیم دی وی منظوری ݙتی ڳئی اے۔ منگل دے ݙینھ جاری بیان موجب وفاقی وزیرِ صحت آکھیا جو اے فیصلہ پاکستان اچ نقلی دوائیں مکاوݨ دے پاسے ہک وݙا تے تاریخی قدم اے۔ پہلی واری ملک اچ ہر دوا کوں ڈیجیٹل طریقے نال ٹریک تے ویریفائی کیتا ونڃ سڳسی، جیندے نال نقلی، غیر معیاری تے نقلی دوائیں دی مؤثر نشاندہی تے انھاں دے خاتمے اچ مدد ملسی۔ انہاں آکھیا جو نویں نظام دے نفاذ دے بعد عام صارفین سوکھیں دوا دی میعادِ استعمال، قیمت تے ٻئی اہم معلومات دی مستند تصدیق کرسڳسن، جیندے نال عوام دا دوائیں دے نظام تے اعتماد مزید تکڑا تھیسی۔مصطفیٰ کمال ݙسایا جو ڈرگ ریگولیٹری اتھارٹی آف پاکستان ایں جدید نظام کوں ملک اچ نافذ کریسی۔ نویں قواعد دے تحت ساری دوا ساز کمپنیاں تے درآمد کنندگان کیتے لازم ہوسی جو او ہر دوا دے پیک تے معیاری ٹو ڈی بارکوڈ تے سیریلائزیشن ڈیٹا درج کرن۔ وفاقی وزیرِ صحت آکھیا جو اے اہم اقدام پاکستان اچ دوائیں دی سپلائی چین کوں محفوظ، شفاف تے معیاری بݨاوݨ کیتے کیتا ڳئے۔ حکومت دوائیں دے شعبے کوں جدید خطوط تے استوار کرݨ کیتے عملی اقدامات کریندی پئی اے تے ٹریک اینڈ ٹریس سسٹم دے نفاذ نال نقلی دوائیں دے خلاف ہک مضبوط تے مؤثر دیوار قائم تھیسی۔ انہاں مزید آکھیا جو پاکستان جدید ٹیکنالوجی دے استعمال اچ خطے دے نمایاں ملکاں اچ شامل تھیسی۔ ایں نظام دے ذریعے نگرانی دے روایتی طریقیں دی جاہ جدید ڈیجیٹل نظام گھن گھنسی جیندے نال عوام دی صحت، زندگی تے اعتماد دا مکمل تحفظ یقینی بݨایا ونڄ سڳسی۔ وفاقی وزیرِ صحت موجب ڈریپ دی طرفوں صنعت کوں سہولت ݙیوݨ کیتے وقتی تکنیکی رہنما اصول جاری کیتے ویسن، جݙاں جو متعلقہ فریقین دے نال مشاورتی اجلاس وی منعقد کیتے ونڄ چکن تاں جو نظام دے مؤثر تے مرحلہ وار نفاذ کوں یقینی بݨایا ونڄ سڳے۔