راجن پور تے مظفر گڑھ اچ زور دی اندھاری پارو سولر پلیٹس ڈہݨ تے بھاہ لڳݨ دے واقعات اچ ہک شخص جاں بحق، 9 زخمی تھئے، ترجمان پی ڈی ایم اے

لاہور۔ 2 جون (اے پی پی) چووی گھنٹے اچ راجن پور تے مظفرگڑھ اچ زور دی اندھاری پاروں سولر پلیٹس ڈہݨ تے بھاہ لڳݨ نال 1 شہری جاں بحق جݙاں جو 9 زخمی تھئن۔ پی ڈی ایم اے دے ترجمان موجب ایں طوفان تے بھاہ لڳݨ نال مجموعی طور تے 46 گھر متاثر تھئن 1 شہری جاں بحق تھیا جݙاں جو 9 شہریاں کوں طبی امداد کیتے ہسپتال منتقل کیتا ڳیا۔ ریلیف کمشنر پنجاب نبیل جاوید زخمیاں کوں بہترین طبی امداد ݙیوݨ دی ہدایت کریندے صوبے دے کمشنرز، ڈپٹی کمشنرز تے ریسکیو اداریں کوں الرٹ رہݨ دی ہدایت کیتی اے تے آکھیے جو 1122 سودھے ٻئے ریسکیو ادارے مشینری سودھےعملے کوں الرٹ رکھن۔ ریلیف کمشنر آکھیا جو وزیرِاعلیٰ پنجاب مریم نواز شریف دی ہدایات دے تحت متاثرہ خانداناں دی مالی معاونت دا عمل شروع کر ݙتا ڳئے۔ڈی جی پی ڈی ایم اے آکھیے جو صوبائی کنٹرول روم سودھےسارے اضلاع دے ڈسٹرکٹ ایمرجنسی آپریشن سنٹرز کوں وی الرٹ کر ݙتا ڳئے تے پی ڈی ایم اے کنٹرول روم اچ صورتحال دی مانیٹرنگ 24/7 جاری اے۔ ڈی جی عمر جاوید آکھیا جو 5 جون تئیں اندھاری، مینھ تے ژالہ باری دی پیشگوئی اے۔ شہریاں توں اپیل اے جو خراب موسم دے الرٹس موجب غیر ضروری نہ کرن ۔ بجلی دے کھمبے تے لڑکدیاں تاراں توں پرے رہن ۔ آسمانی بجلی توں بچݨ سانڳے محفوظ جہیں تے رہن بجلی دی کھمݨ گاج تے طوفانی صورتحال اچ کھلے آسمان تلے اصلوں نہ ونڄن ۔ عمر جاوید مزید آکھیا جو شہری ٻالاں دا دا خاص خیال رکھن انھاں کوں بوسیدہ عمارتاں دے نیڑے اصلوں نہ ونجݨ ݙیون۔ ایمرجنسی دی صورتحال اچ پی ڈی ایم اے دی ہیلپ لائن 1129 تے کال کرن۔ چووی گھنٹے اچ راجن پور تے مظفرگڑھ اچ اندھاری تے بھاہ لڳݨ پاروں 115 مویشی ہلاک تے 3 زخمی تھئن، ہلاک مویشیاں اچ 45 ٻکریاں، 15 ڳویں تے وچھے، 5 گݙاں تے 50 کُکڑیں تے بدکاں شامل ہن۔