سکیورٹی فورسز دے بلوچستان دے مختلف اضلاع اچ انٹیلی جنس بنیاداں تے آپریشنز، بھارتی حمایت یافتہ فتنہ الہندوستان نال تعلق رکھݨ آلے ستاراں دہشت گرد ہلاک

راولپنڈی۔ 2 جون (اے پی پی) سکیورٹی فورسز بلوچستان دے مختلف اضلاع اچ انٹیلی جنس بنیاداں تے ٻہوں سارے آپریشنز دے دوران بھارت دے حمایت یافتہ فتنہ الہندوستان نال تعلق رکھݨ آلے ستاراں دہشت گرداں کوں ہلاک کر ݙتے۔ پاک فوج دے شعبہ تعلقاتِ عامہ (آئی ایس پی آر) توں جاری بیان موجب 24 مئی 2026ء کوں پیش آوݨ آلے ریل گاݙی واقعے دے بعد سکیورٹی فورسز بلوچستان دے اضلاع مستونگ، نوشکی، زہری، خضدار تے کیچ اچ انٹیلی جنس بنیاداں تے ٻہوں سارے آپریشنز کیتے۔ اِنھاں آپریشنز دے دوران سکیورٹی فورسز دہشت گرداں دے ٻہوں سارے ٹھکاݨیں کوں مؤثر انداز اچ نشانہ بݨایا۔ شدید تے بھرپور فائرنگ دے تبادلے دے بعد بھارت دے حمایت یافتہ فتنہ الہندوستان نال تعلق رکھݨ آلے ستاراں دہشت گرداں کوں ہلاک کر ݙتا ڳئے جیندے نال اِنھاں علاقیں اچ سرگرم دہشت گرد نیٹ ورکس کوں وݙا دھچکا پُڄے۔ہلاک تھیوݨ آلے بھارتی حمایت یافتہ دہشت گرداں دے قبضے توں اسلحہ، گولہ بارود، وݙی مقدار اچ دھماکہ خیز مواد تے تیار شدہ دیسی ساختہ بم وی برآمد کیتے ڳئن۔ اے دہشت گرد علاقے اچ ٻہوں ساری دہشت گردانہ کارروائیاں اچ سرگرم طور تے ملوث ہن۔ علاقیں کوں دہشت گرداں توں مکمل طور تے پاک کرݨ کیتے کلیئرنس تے سرچ آپریشنز جاری ہن۔ قومی ایکشن پلان دی وفاقی ایپکس کمیٹی توں منظور شدہ وژن ’’عزمِ استحکام‘‘ دے تحت سکیورٹی فورسز تے قانون نافذ کرݨ آلے اداریں دی طرفوں جاری انسدادِ دہشت گردی مہم پوری رفتار نال جاری رہسی تاں جو ملک توں ٻاہرلی سرپرستی تے حمایت یافتہ دہشت گردی دے ناسور دا مکمل خاتمہ کیتا ونڄ سڳے۔