عالمی معیار دی فریٹ سروس نال صنعتی مصنوعات دی ترسیل اچ سوکھ دے نال نال ریلوے دی سالانہ آمدݨ اچ قابلِ قدر ودھارا ممکن اے، وزیراعظم محمد شہباز شریف

اسلام آباد۔ 3 جون (اے پی پی) وزیراعظم محمد شہباز شریف پاکستان ریلویز دی طویل المدت تے پائیدار ترقی کیتے فریٹ سروس اچ سرمایہ کاری تے میگا منصوبیں دی وقتی تکمیل کوں ترجیح ݙیوݨ دی ہدایت کریندے آکھیے جو عالمی معیار دی فریٹ سروس نال صنعتی مصنوعات دی ترسیل اچ سوکھ دے نال نال ریلوے دی سالانہ آمدݨ اچ قابلِ قدر ودھارا ممکن اے۔ او اپݨی زیرِ صدارت پاکستان ریلویز اچ ترقیاتی منصوبیں دی پیش رفت تے جائزہ اجلاس توں خطاب کریندے پئے ہن۔ وزیراعظم دفتر دے میڈیا ونگ توں جاری بیان موجب وزیراعظم آکھیا جو پاکستان ریلویز مسافراں دی سہولت تے ریلوے سٹیشنز دی بہتری کیتے قابلِ ستائش کم کیتے۔ انھاں ہدایت کیتی جو ریلوے دی طویل المدت تے پائیدار ترقی کیتے فریٹ سروس اچ سرمایہ کاری تے میگا منصوبیں دی وقتی تکمیل ریلویز دی پالیسی ترجیحات ہووݨی چاہیدی اے، عالمی معیار دی فریٹ سروس نال صنعتی مصنوعات دی ترسیل اچ سوکھ دے نال نال ریلوے دی سالانہ آمدݨ اچ قابلِ قدرودھارا ممکن اے۔وزیراعظم ہدایت کیتی جو ریلوے دے جاری میگا منصوبیں اچ مالی تے ادارہ جاتی انتظامات دی پیشگی منظوری کوں یقینی بݨایا ونڄے تاں جو منصوبیں دی تکمیل اچ غیر ضروری تعطل تے تاخیر توں بچیا ونڄ سڳے۔ انھاں پاکستان ریلویز دے میگا پراجیکٹس بالخصوص ایم ایل 1، ایم ایل 3 تے تھر کول ریل منصوبہ دی وقتی تکمیل کیتے وفاقی تے صوبائی حکومتاں کوں سانجھے تعاون نال کم کرݨ دی ہدایت کیتی۔ وزیراعظم آکھیا جو میگا پراجیکٹس دی معیاری تے وقتی تکمیل نال تعمیری لاڳت اچ کمی تے قیمتی سرمایہ بچایا ونڄ سڳدے۔ انھاں آکھیا جو آندے بجٹ اچ ریلویز دے میگا منصوبیں کیتے بجٹ ݙیوݨ یقینی بݨایا ویسے۔ انھاں آکھیا جو سارے جاری منصوبیں اچ عالمی معیار، انتظامی شفافیت تے کارکردگی کوں یقینی بݨاوݨ حکومت دی اولین ترجیح اے۔ ایں اجلاس اچ وفاقی وزیر ریلویز محمد حنیف عباسی تے سیکرٹری ریلوے دی طرفوں اقدامات تے منصوبیں دی پیشرفت تے بریفنگ ݙتی ڳئی جیندے اچ ݙسایا ڳیا جو فریٹ سروس اچ اصلاحاتی اقدامات پاروں اڄوکے سال جون تئیں 40 ارب تئیں دی تاریخی آمدݨ متوقع اے۔ اجلاس اچ وفاقی وزیرریلویز محمد حنیف عباسی، وفاقی وزیر اقتصادی امور احد خان چیمہ، وفاقی وزیرِ خزانہ محمد اورنگزیب، وفاقی وزیر پلاننگ اینڈ ڈویلپمنٹ احسن اقبال، وزیراعظم دے معاونِ خصوصی صنعت و پیداوار ہارون اختر تے متعلقہ اداریں دے عہدیداراں شرکت کیتی۔