وزیراعظم نال چینی سفیر دی ملاقات، دورہِ چین اچ طے پاوݨ آلے اہم فیصلیں تے مفاہمتاں تے عملدرآمد کیتے وقتی اقدامات کیتے ویسن، محمد شہباز شریف

اسلام آباد۔ 3 جون (اے پی پی) وزیراعظم محمد شہباز شریف پاکستان تے چین وچال سدابہار سٹریٹجک تعاون تے مبنی شراکت داری کوں مزید مستحکم بݨاوݨ دے غیرمتزلزل عزم دا اعادہ کریندے دورہِ چین دے دوران طے پاوݨ آلے اہم فیصلیں تے مفاہمتی یادداشتاں تے عملدرآمد کیتے وقتی تے مؤثر اقدامات دی لوڑھ تے تے زور ݙتا۔ وزیراعظم دفتر دے میڈیا ونگ توں جاری بیان موجب عوامی جمہوریہ چین دے سفیر جیانگ زائی ڈونگ وزیراعظم ہاؤس اچ وزیراعظم محمد شہباز شریف نال ملاقات کیتی، ایں موقعے تے وزیراعظم دے مشیر ڈاکٹر سید توقیر شاہ، معاونِ خصوصی سید طارق فاطمی تے سیکرٹری خارجہ آمنہ بلوچ وی موجود ہن۔وزیراعظم محمد شہباز شریف عوامی جمہوریہ چین دے صدر شی جن پنگ تے وزیراعظم لی چیانگ کیتے اپݨی نیک تمناواں تے خیر سگالی دے جذبات دا اظہار کیتا تے اپݨے اڄوکے دورہِ چین دے دوران چینی قیادت دے نال تھیوݨ آلی فیدہ مند ، بامقصد تے نتیجہ خیز ملاقاتاں دا ذکر کیتا۔ وزیراعظم پاکستان تے چین وچال سدابہار سٹریٹجک تعاون تے مبنی شراکت داری کوں مزید مستحکم بݨاوݨ دے اپݨے غیرمتزلزل عزم دا اعادہ کریندے ایں امر تے زور ݙتا جو دورہِ چین دے دوران طے پاوݨ آلے اہم فیصلیں تے مفاہمتاں تے عملدرآمد کیتے فوری تے مؤثر اقدامات کیتے ویسن۔ انھاں بالخصوص چین پاکستان اقتصادی راہداری (سی پیک) دے ٻئے مرحلے (سی پیک 2.0) دے تحت زراعت، انفارمیشن ٹیکنالوجی، صنعتی ترقی، خصوصی اقتصادی زونز تے معدنیات و کان کنی دے شعبیں اچ تعاون مزید ودھاوݨ دی لوڑھ تے زور ݙتا۔وزیراعظم ایں ڳالھ تے وی زور ݙتا جو انھاں دے دورہِ چین دے موقع تے ہانگژو اچ منعقدہ بزنس ٹو بزنس سرمایہ کاری کانفرنس دے دوران پاکستانی تے چینی کمپنیاں وچال طے پاوݨ آلی مختلف مفاہمتی یادداشتاں تے وقتی تے مؤثر عملدرآمد یقینی بݨایا ونڄے تاں جو ݙوہیں ملکاں وچال اقتصادی تعاون دے ثمرات وقتی ڳھدے ونڄ سڳن ۔انھاں دورہِ چین کوں ہر لحاظ نال کامیاب بݨاوݨ اچ چینی سفیر دی خدمات تے کوششاں دی تعریف کریندے آکھیا جو ہݨ ݙوہیں ملکاں دے متعلقہ اداریں تے حکام تے اے ذمہ واری لڳدی اے جو ݙوہیں قیادتاں دے طے کردہ فیصلیں کوں عملی شکل ݙیوݨ کیتے سانجھا تعاون ودھاون۔ملاقات اچ قراقرم ہائی وے ری الائنمنٹ منصوبے تے پیشرفت کوں تکھا کرݨ، سکیورٹی، انسدادِ دہشت گردی تے دفاعی تعاون دے ودھارے نیز پاکستان کیتے اقتصادی تے مالی معاونت متعلق امور تے وی تفصیلی ڳالھ مہاڑ کیتی ڳئی ۔ ایندے علاوہ خطے دی بدلدی صورتحال تے اہم بین الاقوامی پیشرفت تے وی ڳالھ تھئی ۔ چینی سفیر جیانگ زائی ڈونگ نے وزیراعظم دا شکریہ ادا کیتا تے انھاں کوں عیدالاضحیٰ دی مبارخ ݙتی۔ انھاں وزیراعظم کوں اڄوکے کامیاب دورہِ چین تے وی مبارخ ݙیندے ایں اعتماد دا اظہار کیتا جو چین پاکستان دے نال اپݨی فولادی تے لازوال برادرانہ دوستی کوں مزید تکڑا بݨاوݨ تے سارے شعبیں اچ ݙوپاسے تعاون ودھاوݨ کیتے پُرعزم اے۔