وفاقی وزیر صحت مصطفیٰ کمال نال ورلڈ بینک گروپ دی نائب صدر پیپلز وائس ممتا مورتی دی ملاقات

اسلام آباد۔ 3 جون (اے پی پی) وفاقی وزیر صحت مصطفیٰ کمال نال ورلڈ بینک گروپ دی نائب صدر پیپلز وائس ممتا مورتی ہک اعلیٰ سطحی وفد دے رلے ملاقات کیتی۔ وفد اچ ورلڈ بینک دے سینئر حکام، پاکستان دے کنٹری ڈائریکٹر، علاقائی نمائندے تے صحت دے شعبے دے ماہرین شامل ہن۔ ملاقات اچ پاکستان دے صحت دے نظام کوں درپیش چیلنجز، انھاں دے مؤثر حل، بنیادی صحت دی سہولتاں، ماء تے ٻال دی صحت دے ودھارے، غذائی کمی تے ٻالاں اچ نشوونما دی رکاوٹ (اسٹنٹنگ) تے قابو پاوݨ کیتے جاری اقدامات تے تفصیلی ڳالھ کیتی ڳئی۔ ایں موقع تے ورلڈ بینک دے تعاون نال صحت دے شعبے اچ جاری مختلف پروگراموں دا وی جائزہ ڳھدا ڳیا۔وفاقی وزیر صحت مصطفیٰ کمال وفد کوں صحت دے شعبے اچ درپیش چیلنجز، حکومت دے جاری اقدامات تے مستقبل دی ترجیحات دا ݙسیندے آکھیا جو حکومتِ پاکستان موجودہ ہیلتھ کیئر سسٹم کوں حقیقی معنے اچ ہک مؤثر تے عوام دوست نظامِ صحت اچ تبدیل کرݨ کیتے پرعزم اے۔ انھاں آکھیا جو پرائمری ہیلتھ کیئر نظام کوں ٹیلی میڈیسن دے ذریعے مضبوط بݨایا ویندا پئے تاں جو پرے دے علاقیں اچ وی معیاری طبی سہولتاں ݙیوݨ یقینی بݨائی ونڃ سڳے۔ انھاں مزید آکھیا جو وݙے ہسپتالاں تے دٻاؤ گھٹ کرݨ کیتے ہک مؤثر ریفرل سسٹم متعارف کرایا ویندا پئے۔ مصطفیٰ کمال آکھیا جو انھاں دی اولین ترجیح لوکاں کوں بیماریاں توں محفوظ رکھِا اے تے ایں مقصد دے تحت احتیاطی صحت دے اقدامات تے خصوصی توجہ ݙتی ویندی پئی اے۔ انھاں ایں ڳالھ تے زور ݙتا جو 2030ء توں پہلے پاکستان اچ مقامی سطح تے ویکسین دی پیداوار ناگزیر اے تے ایں حوالے نال اہم پیش رفت تھی چکی اے۔ وفاقی وزیر صحت ݙسایا جو تیرہ مختلف بیماریاں دی ویکسین دی مقامی تیاری کیتے انڈونیشیا دے نال معاہدیں تے پیش رفت جاری اے۔ انھاں آکھیا جو پاکستان دی تاریخ اچ پہلی واری ہک جامع قومی ویکسین پالیسی تشکیل ݙتی ڳئی اے، جیڑھی ملک اچ ویکسین دی تیاری تے دستیابی دے ودھارے اچ اہم کردار ادا کریسی