بار تے بنچ وچال مضبوط، مسلسل تے تعمیری رابطہ مؤثر تے وقتی انصاف ݙیوݨ کیتے ناگزیراے، چیف جسٹس یحییٰ آفریدی

اسلام آباد۔ 3 جون (اے پی پی) چیف جسٹس آف پاکستان جسٹس یحییٰ آفریدی آکھیے جو بار تے بنچ وچال مضبوط، مسلسل تے تعمیری رابطہ مؤثر تے وقتی انصاف ݙیوݨ کیتے ناگزیر اے تے عدالتی نظام اچ جاری اصلاحات دا مقصد عوام کوں سستا، تکھاتے شفاف انصاف ݙیوݨ اے۔ جاری اعلامیہ موجب سپریم کورٹ اچ عدالتی اصلاحات تے نظامِ انصاف دی بہتری دے حوالے نال ہک اہم مشاورتی اجلاس منعقد تھیا جیں دی صدارت چیف جسٹس آف پاکستان کیتی۔ سپریم کورٹ اچ تھیوݨ آلے ایں اجلاس اچ اٹارنی جنرل آف پاکستان منصور عثمان اعوان وی شریک تھئے۔ اجلاس اچ لاہور ہائی کورٹ بار ایسوسی ایشن، ڈسٹرکٹ بار ایسوسی ایشن بہاولنگر، تحصیل بار ایسوسی ایشن کبیر والا، میاں چنوں، یزمان، شیخوپورہ تے اسلام آباد بار ایسوسی ایشن دے نمائندیں شرکت کیتی۔چیف جسٹس اپݨے خطاب اچ آکھیا جو وکلاء برادری نظامِ انصاف دا مرکزی ستون اے تے عدالتی کارکردگی اچ بہتری کیتے بار دا کردار کلیدی حیثیت رکھیندے۔ انھاں آکھیا جو زیرِ عمل اصلاحات دا بنیادی مقصد مقدمات دے بروقت فیصلے، عدالتی طریقہ کار دی بہتری تے سائلین کوں فوری ریلیف ݙیوݨ اے۔ اجلاس اچ عدالتی اصلاحات، کیس مینجمنٹ سسٹم، ای فائلنگ، ویڈیو لنک سماعتاں، عوامی سہولت مرکز، تے متبادل جھیڑے دے حل (اے ڈی آر) دے نظام تے تفصیلی ڳالھ کیتی۔ اجلاس کوں بریفنگ ݙیندے ݙسایا ڳیا جو نیشنل جوڈیشل کمیٹی (پالیسی میکنگ) تے لاء اینڈ جسٹس کمیشن آف پاکستان دے تحت مختلف اصلاحاتی اقدامات تے عملدرآمد جاری اے۔ چیف جسٹس مزید آکھیا جو فیڈرل جوڈیشل اکیڈمی دے ذریعے وکلاء خصوصاً نوجوان وکلاء کیتے تربیتی پروگرامز جاری ہن تاں جو پیشہ وارانہ صلاحیتاں اچ ودھارا تھی سڳے. اجلاس اچ خواتین فیسیلیٹیشن سینٹرز،ای لائبریریز، عدالتی عمارتاں دی سولرائزیشن، پیوݨ دا صاف پاݨی ݙیوݨ تے ڈیجیٹل انفراسٹرکچر دی بہتری جیھے اقدامات تے وی روشنی پاتی ڳئی۔ اجلاس ایں عزم دے نال اختتام پذیر تھیا جو عدلیہ تے وکلاء برادری وچال تعاون کوں مزید مضبوط بݨا تے ہک جدید، مؤثر تے عوام دوست نظامِ انصاف کوں ودھارا ݙتا ویسے