پاکستان دے بحری شعبے اچ سعودی سرمایہ کاراں کیتے وسیع موقع موجود ہن، محمد جنید انوار چوہدری

اسلام آباد۔ 3 جون (اے پی پی) وفاقی وزیر بحری امور محمد جنید انوار چوہدری آکھیے جو پاکستان دا بحری شعبہ بندرگاہواں، لاجسٹکس، بلیو اکانومی منصوبیں تے متعلقہ انفراسٹرکچر اچ سرمایہ کاری دے وسیع موقع ݙیندے جݙاں جو ملک دا تزویراتی محلِ وقوع تے تجارتی رابطے اچ توسیع ایں کوں سرمایہ کاراں کیتے مزید پرکشش بݨیندن۔ وزارت توں جاری پریس ریلیز موجب اے ڳالھ پاکستان-سعودی عرب مشترکہ بزنس کونسل (جے بی سی) دے چیئرمین منصور بن محمد السعود تے ٻنہاں شرکاء دے نال تھیوݨ آلے آن لائن اجلاس توں خطاب کریندے آکھی ۔ وفاقی وزیر آکھیا جو پاکستان دے بحری شعبے اچ بالخصوص بندرگاہواں، لاجسٹکس، بلیو اکانومی تے معاون انفراسٹرکچر دے شعبیں اچ سرمایہ کاری دی بھرپور گنجائش موجود اے۔ انھاں آکھیا جو سعودی عرب دے وژن 2030ء تے پاکستان دی ترقیاتی ترجیحات دے تناظر اچ ݙوہیں ملکاں وچال تعاون دے وسیع امکانات موجود ہن۔محمد جنید انوار چوہدری پاکستان تے سعودی عرب دے پراݨے برادرانہ تعلقات دا ذکر کریندے آکھیا جو ݙوہیں ملکاں وچال اقتصادی تے تزویراتی شعبیں اچ شراکت داری مسلسل مضبوط تھیندی پئی اے۔ اجلاس اچ ملک دی ساری وݙی بندرگاہواں دے چیئرمین، پاکستان نیشنل شپنگ کارپوریشن دے چیف ایگزیکٹو افسر، کورنگی فش ہاربر اتھارٹی دے منیجنگ ڈائریکٹر، سپیشل انویسٹمنٹ فیسیلیٹیشن کونسل (ایس آئی ایف سی) دے نمائندے تے سعودی عرب اچ پاکستان دے سفیر شرکت کیتی۔ اجلاس دے دوران کراچی پورٹ، پورٹ قاسم، گوادر پورٹ تے پاکستان نیشنل شپنگ کارپوریشن اچ سرمایہ کاری دے موقع تے تفصیلی ڳالھ کیتی۔ وفاقی وزیر آکھیا جو سعودی سرمایہ کار کراچی پورٹ ٹرسٹ (کے پی ٹی) دے تحت مجوزہ میری ٹائم بزنس ڈسٹرکٹ، میرین ورکشاپ منصوبے تے منوڑہ اچ ڈرائی ڈاک و فلوٹنگ ڈاک سہولت اچ سرمایہ کاری دے موقع دا جائزہ گھن سڳدن۔ انھاں ݙسایا جو پورٹ قاسم تے ہک کثیر المقاصد کارگو ٹرمینل، ہک مربوط ٻئے آئل ٹرمینل تے سٹوریج فارم دے قیام دے علاوہ انرجی سٹی منصوبے اچ وی سرمایہ کاری دے موقع موجود ہن۔محمد جنید انوار چوہدری سعودی سرمایہ کاراں کوں پی این ایس سی دے ٻیڑے اچ توسیع تے کورنگی فش ہاربر اتھارٹی اچ تقریباً 100 ایکڑ تے محیط ایکوا ریسرچ اینڈ ٹیکنالوجی پارک (اے آر ٹی پارک) دے قیام اچ سرمایہ کاری دی دعوت وی ݙتی۔ اجلاس دے دوران سعودی عرب بزنس کونسل کوں بریفنگ ݙیندے کراچی پورٹ ٹرسٹ دے چیئرمین ریئر ایڈمرل (ر) شاہد احمد 140 ایکڑ قیمتی ساحلی شہری زمین تے مشتمل میری ٹائم بزنس ڈسٹرکٹ منصوبے دی اہمیت تے سرمایہ کاری دے امکانات تے روشنی پاتی۔ پورٹ قاسم اتھارٹی دے چیئرمین ریئر ایڈمرل (ر) سید معظم الیاس شرکاء کوں ݙسایا جو بندرگاہ تے بلڈ، آپریٹ اینڈ ٹرانسفر (بی او ٹی) بنیادوں تے ہک مربوط ٻئے آئل ٹرمینل تے سٹوریج فارم دے قیام دا منصوبہ زیرِ غور اے