پاکستان دا حج کوٹہ 100 فیصد استعمال تھئے، وزارت دی بہترین کارکردگی، پرائیویٹ سیکٹر دی سخت مانیٹرنگ پاروں ‘لبیتم’ سودھے 4 عالمی ایوارڈ ملئے، وفاقی وزیر مذہبی امور دی مدینہ منورہ اچ پریس کانفرنس

مدینہ منورہ۔ 4 جون (اے پی پی) وفاقی وزیر مذہبی امور و بین المذاہب ہم آہنگی سردار محمد یوسف آکھیے جو پاکستان حج 2026ء اچ اپݨا ہک لکھ 80 ہزار دا 100 فیصد کوٹہ استعمال کیتے، وزارتِ مذہبی امور دی بہترین کارکردگی تے پرائیویٹ سیکٹر دی مؤثر نگرانی پاروں پاکستان کوں سعودی حکومت دی طرفوں ‘لبیتم’ سودھے 4 ایوارڈ ملئن، حکومت دے نال نال اساݙے پرائیویٹ سیکٹر وی پاکستان دے عازمینِ حج کوں مثالی سہولتاں ݙتیاں ۔ او مدینہ منورہ اچ پاکستان حج مشن دے ایم سی او دے دورے دے موقع تے میڈیا نال ڳالھ کریندے پئے ہن۔ ڈائریکٹر مدینہ منورہ زاہد سہیل وفاقی وزیر مذہبی امور کوں پاکستان حج مشن اچ قائم مرکزی کلینک دے سارے شعبہ جات، ایم سی او اچ قائم شکایات سیل، ارلی ڈیپارچر سیل، لاسٹ اینڈ فاؤنڈ سیل، ڈیجیٹل انڈکشن سیل، آئی ٹی سیل سودھے ٻئے سارے شعبہ جات دا معائنہ کرایا۔ ڈائریکٹر مدینہ زاہد سہیل وفاقی وزیر کوں مدینہ پری حج تے پوسٹ حج انتظامات متعلق تفصیلی بریفنگ وی ݙتی۔ بعد اچ میڈیا نال ڳالھ کریندے وفاقی وزیرݙسایا جو اڄوکے سال 14 اپریل توں شروع تھیوݨ آلے پری حج آپریشن دے پہلے مرحلے اچ 46 ہزار 945 حجاج مدینہ منورہ لینڈ کیتا جتھاں ڈیجیٹل مانیٹرنگ تے مربوط حکمتِ عملی دے ذریعے 100 فیصد حجاج کوں ریاض الجنہ دی زیارت کرائی ڳئی۔ انھاں آکھیا جو مدینہ منورہ آوݨ آلے سارے عازمین کوں مسجدِ نبوی دے بالکل نیڑے ‘مرکزیہ’ دے ہوٹلاں اچ رہائش ݙتی ڳئی تاں جو بزرگ تے بیمار حجاج کوں آونڄ اچ کوئی پریشانی نہ تھیوے۔ وفاقی وزیر سردار محمد یوسف ڈائریکٹر مدینہ زاہد سہیل دی طرفوں ݙتی ڳئی بریفنگ تے اطمینان دا اظہار کریندے آکھیا جو میݙی حجاج کرام نال براہِ راست ملاقاتاں دے دوران وی انتظامات تے مثبت ردِعمل سامݨے آیا ڈائریکٹر مدینہ دی سربراہی اچ ٹیم انتھک محنت کیتی اے، پوری ٹیم کوں شاباش ݙینداں انھاں کوں تعریفی سنداں نال وی نوازیا ویسی۔ انھاں واضح کیتا جو پاکستان اچ ݙتی ونڄݨ آلی حج ٹریننگ تے معلومات دا حجاج کوں سعودی عرب اچ ٻہوں فیدہ تھئے تے نظم و ضبط برقرار رہیا۔