عراق اچ زائرین دی بس الٹݨ نال 21 بندے جاں بحق، 19 زخمی

بغداد۔ 8 جون (اے پی پی) جنوبی عراق دے صوبے ذی قار اچ ناصریہ-بصرہ ہائی وے تے مسافر بس الٹݨ نال 21 بندے جاں بحق تے 19 زخمی تھی ڳئن۔ العربیہ اردو دے مطابق سکیورٹی ذرائع ݙسائے جو اے حادثہ گزریل ݙینھ اوں ویلھے پیش آیا جݙاں بس کربلا ونڃݨ آلے مسافراں کوں گھن تے ویندی پئی ہئی جو ایں دوران بس الٹ ڳئی جیندے بعد بس اچ بھا لگ ڳئی اتے او پورے دی پوری سڑ ڳئی۔ عراق دی وزارتِ صحت ݙسائے جو حادثے دے نتیجے اچ 21 بندے جاں بحق تے 19 زخمی تھی ڳئے، متاثرین اچ ایرانی زائرین وی شامل ہن۔ وزارت ݙسایا جو ڳول پھول اتے بچاؤ دی کارروائیاں جاری ہن۔ ڈوجھے پاسے طبی ذرائع فارنسک میڈیسن دے محکمے اچ سڑی ہوئیاں لاشاں دے آوݨ دی اطلاع ݙتی اے۔ وزارتِ صحت بیان اچ اکھیا جو وزیرِ صحت عبدالحسین الموسوی ناصریہ تے بصرہ کوں جوڑݨ آلی سڑک تے زائرین دی ہک وݙی تعداد کوں گھن ونڄݨ آلی بس دے الٹݨ دے حادثے دا جائزہ گھدے۔ انہاں طبی، صحت تے ایمبولینس دے شعبیاں کوں تکھا کرݨ تے حادثے نال نٻڑݨ تے زخمیاں کوں ضروری طبی نگہداشت ݙیوݨ کیتے سارے موجود وسائل کوں کم وچ آوݨ دی ہدایت کیتی اے۔ وزیرِ صحت متعلقہ ہیلتھ ڈائریکٹوریٹ تے طبی اداریاں کوں ہدایت کیتی جو او زخمیاں کوں ہنگامی علاج دی خدمات تے ضروری طبی سہولتاں دی فراہمی کوں یقینی بݨاون۔