ڈیرہ غازی خان، اڈہ شاہ میاں ابراہیم اچ فائرنگ دا افسوسناک واقعہ، ݙو بندے جاں بحق

ڈیرہ غازی خان۔ 08 جون (اے پی پی) ڈیرہ غازی خان دے نواحی علاقے اڈہ شاہ میاں ابراہیم، شاہ صدر دین اچ فائرنگ دے افسوسناک واقعے اچ نرسنگ دی ہک طالبہ سمیت ݙو بندے جاں بحق جڈانجو ہک شہری زخمی تھی ڳیا۔ ریسکیو 1122 دے مطابق کنٹرول روم کوں اطلاع ملی ہئی جو ݙو دھڑیاں (فریقین) وچال جھیڑے دے دوران فائرنگ دا واقعہ تھئے ۔ اطلاع ملدیں ای ریسکیو 1122 دیاں ایمبولینسز جلدی نال جائے وقوعہ تے پڄ ڳیاں اتے امدادی کارروائیاں شروع کر ݙتیاں۔ ابتدائی معلومات دے مطابق 23 سال دی امیمہ فاروق دِھی (دختر) محمد فاروق، جیہڑی نرسنگ دی طالبہ ہئی، فائرنگ دے نتیجے اچ جاں بحق تھی ڳئی۔ ایں واقعے اچ 20 سال دا تنویر پُتر (ولد) موسیٰ خان وی سر اچ گولی لگݨ پاروں جان دی بازی ہار ڳیا۔ ݙسایا ویندا پئے جو فائرنگ کرݨ آلے بندے بعد اچ آپݨے آپ کوں وی گولی مار ݙتی۔ فائرنگ دے دوران وچالے آوݨ آلا  38 سال دا محمد ریاض پُتر واحد بخش ݙوہیں لتاں اچ گولیاں لگݨ نال زخمی تھی ڳیا جینکوں ریسکیو اہلکاراں ابتدائی طبی امداد ݙیوݨ دے بعد علامہ اقبال ٹیچنگ ہسپتال ڈیرہ غازی خان منتقل کر ݙتا۔ واقعے دی اطلاع ملدیں تھانہ شاہ صدر دین پولیس ایس ایچ او عمران خالد دی اڳواݨی اچ موقع تے پڄ ڳئی۔ پولیس قانونی کارروائی پوری کرݨ دے بعد جاں بحق تھیوݨ آلے لوکاں دیاں لاشاں پوسٹ مارٹم کیتے ہسپتال منتقل کر ݙتیاں جڈانجو واقعے دے مختلف پاسیاں توں پچھ ڳچھ (تحقیقات) دا آغاز کر ݙتا گئے۔ ایس ایچ او میڈیا کوں ݙسایا جو واقعہ دی تحقیقات کیتی ویندی پئی اے جو فائرنگ کرݨ آلے بندے مقتولہ کوں کیڑھی وجہ توں گولی ماری اتے بعد وچ آپݨے آپ کوں کیوں گولی ماری۔