عالمی چیلنجز، چھل تے علاقائی کشیدگی دے باوجود پاکستان 3.7 فیصد معاشی نمو حاصل کیتی، وزیرِ خزانہ محمد اورنگزیب

اسلام آباد۔ 11 جون (اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو پاکستان عالمی تجارتی غیر یقینی صورتحال، تباہ کن چھل، مشرقِ وسطیٰ دے بحران تے علاقائی کشیدگی جیھے وݙے چیلنجز دے باوجود مالی سال 2025-26 اچ 3.7 فیصد مجموعی قومی پیداوار (جی ڈی پی) دی شرحِ نمو حاصل کر تے معاشی استحکام تے مضبوطی دا مظاہرہ کیتے۔ اے ڳالھ انہاں اتھاں قومی اقتصادی سروے 2025-26 پیش کریندے آکھی۔ایں موقع تے وفاقی وزیرِ منصوبہ بندی، ترقی و اصلاحات پروفیسر احسن اقبال، وفاقی وزیرِ اطلاعات و نشریات عطاء اللہ تارڑ، وزیرِ مملکت برائے خزانہ و ریلوے بلال اظہر کیانی سودھے چیئرمین ایف بی آر، سیکرٹری فنانس، سیکرٹری اقتصادی امور ڈویژن تے اعلیٰ حکام وی موجود ہن۔ وزیرِ خزانہ آکھیے جو اے سروے محض اعداد و شمار دا مجموعہ نئی بلکہ گزریل ہک سال دے دوران پاکستانی معیشت دی مزاحمت، نظم و ضبط تے بحالی دی داستان اے۔ انھاں آکھیے جو مالی سال دے آغاز تے عالمی سطح تے ٹیرف تے تجارتی پالیسیاں توں پیدا تھیوݨ آلی غیر یقینی صورتحال دا سامݨا ہئی، بعد اچ ملک کوں شدید ساوݨ مینھ تے چھل متاثر کیتا جݙانجو بعد اچ علاقائی کشیدگی تے جغرافیائی سیاسی حالات وی دٻاؤ ودھایا تاں جو حکومت مؤثر حکمتِ عملی تے وقتی فیصلیں دے ذریعے معیشت کوں مستحکم رکھیا۔وزیرِ خزانہ آکھیے جو پاکستان گزریل کجھ سالاں دے دوران معاشی اوکھ توں نکل تے بتدریج ترقی دی راہ تے گامزن تھیے۔ 2023ء اچ ملکی معیشت اچ 0.2 فیصد سکڑاؤ آیا ہئی جیں دے بعد 2024ء اچ 2.6 فیصد تے 2025ء اچ 3.2 فیصد شرحِ نمو حاصل تھئی جڈانجو اڄوکے مالی سال اچ اے شرح ودھ تے 3.7 فیصد تھی ڳئی اے جیڑھی جو گزریل چار سالاں دی بلند ترین سطح اے۔ انھاں ݙسائے جو پاکستان دی معیشت دا حجم تاریخ اچ پہلی واری 126.9 کھرب روپے یا 452.1 ارب ڈالر تئیں پڄ ڳئے جڈانجو فی کس آمدݨ 1,751 ڈالر توں ودھ تے 1,901 ڈالر تھی ڳئی اے۔ انھاں دے مطابق اے پیش رفت معیشت اچ بحال تھیوݨ آلے اعتماد تے مثبت رجحانات دی عکاس اے۔وزیرِخزانہ آکھیے جو زرعی شعبے چھل توں تھیوݨ آلے نقصانات دے باوجود 2.89 فیصد نمو حاصل کیتی۔ فصلات دے شعبے ول مثبت نمو دی طرف واپسی کیتی جڈانجو لائیو سٹاک آپݨی مضبوط کارکردگی برقرار رکھی۔ انھاں ݙسائے جو زرعی شعبے دی مجموعی پیداوار اچ لائیو سٹاک دا حصہ تقریباً 60 فیصد اے تے ایہو شعبہ دیہی معیشت دے استحکام اچ بنیادی کردار ادا کریندا پئے۔ صنعتی شعبے دے بارے اچ انھاں آکھیے جو مجموعی طور تے صنعتی شعبے 3.51 فیصد ترقی کیتی جڈانجو وݙے پیمانے دی صنعتاں (ایل ایس ایم) اچ 6.11 فیصد نمایاں ودھارا ریکارڈ کیتا ڳیا۔ انھاں آکھیے جو 22 صنعتی شعبیں اچوں 16 مثبت کارکردگی ݙکھائی۔ خوراک، ٹیکسٹائل، آٹوموبائل، پٹرولیم مصنوعات، برقی آلات تے ٻین مینوفیکچرنگ شعبیں اچ پیداوار ودھی جیں توں کاروباری سرگرمیوں اچ بہتری تے صنعتی اعتماد اچ ودھارے دا اظہار تھیندے۔انھاں آکھیے جو میکرو اکنامک استحکام، شرحِ مبادلہ اچ استحکام، مہانگ اچ کمی تے کاروباری ماحول اچ بہتری صنعتی ترقی اچ اہم کردار ادا کیتا۔ طلب دے اشاریں توں وی معیشت اچ سرگرمی دا اندازہ تھیندے۔ سیمٹ دی طلب اچ 10 فیصد، کھاد دی کھپت اچ 17 فیصد تے گاݙیاں دی وکامت اچ 31 فیصد ودھارا ریکارڈ کیتا ڳیا جڈانجو پٹرولیم مصنوعات تے موبائل فون دے استعمال اچ وی ودھارا ݙٹھا ڳیا۔ وزیرِ خزانہ آکھیے جو خدمات دا شعبہ ملکی معیشت دا سبھ توں وݙا حصہ اے تے ایں دا مجموعی قومی پیداوار اچ حصہ 58 فیصد توں زیادہ اے۔ اڄوکے مالی سال ایں شعبے 4.09 فیصد ترقی کیتی جڈانجو اطلاعات و مواصلات دے شعبے اچ 7.52 فیصد دی نمایاں شرحِ نمو ریکارڈ کیتی ڳئی۔ انھاں موجب اے رجحان ایں امر دی نشاندہی کریندے جو پاکستان دی معیشت اچ ڈیجیٹل تے ٹیکنالوجی تے مبنی سرگرمیاں دا کردار مسلسل ودھدا پئے۔مالیاتی شعبے دی کارکردگی تے روشنی سٹیندے ہوئیں انھاں آکھیے جو حکومت مالیاتی نظم و ضبط برقرار رکھیا جیں دے نتیجے اچ جولائی توں مارچ مالی سال 2026 دے دوران مالیاتی خسارہ گھٹ تھی تے جی ڈی پی دے 0.7 فیصد تئیں آڳیا جیڑھا جو گزریل سال ایں عرصے اچ 2.6 فیصد ہئی۔ ایں طرزیح بنیادی سرپلس ودھ تے 3.2 فیصد تئیں پڄ ڳیا۔ مجموعی حکومتی آمدݨ 10.7 فیصد ودھارے دے بعد 14.8 کھرب روپے تئیں پڄ ڳئی جڈانجو فیڈرل بورڈ آف ریونیو دی وصولیاں اچ وی نمایاں ودھارا تھئے۔ انھاں ݙسائے جو سودی ادائیگیاں اچ 23 فیصد کمی آئی جیں پاروں حکومت کوں ترقیاتی تے سماجی شعبیں کیتے زیادہ مالی گنجائش میسر آئی۔ انھاں دا آکھݨ ہئی جو اے پیش رفت حکومت دی محتاط مالیاتی پالیسیاں تے معاشی اصلاحات دا نتیجہ اے۔افراطِ زر دے حوالے نال وزیرِ خزانہ آکھیے جو پورے سال دے دوران مہانگ دی شرح مجموعی طور تے قابو اچ رہی تے جولائی توں اپریل اومت مہانگ 6.2 فیصد ریکارڈ کیتی ڳئی تاں جو مشرقِ وسطیٰ اچ جاری کشیدگی، عالمی منڈی اچ تیل دیاں قیمتاں اچ ودھارے تے سپلائی چین اچ رکاوٹاں پاروں اڄوکے مہینے اچ کجھ دٻاؤ ضرور پیدا تھیا۔ ٻاہرلے شعبے دی کارکردگی دا ذکر کریندے ہوئیں انھاں آکھیے جو جولائی توں مارچ مالی سال 2026 دے دوران جاری کھاتہ 7 کروڑ 20 لکھ ڈالر سرپلس اچ رہیا جڈانجو ٻاہرلےِ ملک مقیم پاکستانیاں دیاں ترسیلاتِ زر 8.2 فیصد ودھارے نال 30.3 ارب ڈالر تئیں پڄ ڳئیاں۔ انھاں آکھیے جو مارچ 2026ء دے اختتام تئیں زرمبادلہ دے ذخائر 21.8 ارب ڈالر تھی ڳئے ہن جیں توں شرحِ مبادلہ اچ استحکام برقرار رکھݨ اچ مدد ملی۔وزیرِ خزانہ آکھیے جو پاکستان سٹاک ایکسچینج وی شاندار کارکردگی ݙکھائی تے کے ایس ای-100 انڈیکس اچ 18.4 فیصد ودھارا ریکارڈ کیتا ڳیا۔ انھاں موجب مہانگ اچ کمی، شرحِ سود اچ نرمی، بہتر معاشی اشارییں تے سرمایہ کاراں دے اعتماد اچ ودھارے سرمایہ مارکیٹ کوں تقویت ݙتی۔ انھاں آکھیے جو آئی ٹی تے ڈیجیٹل معیشت پاکستان دی ترقی دے نویں ستون دے طور تے ابھردی پئی اے۔ آئی سی ٹی برآمدات توں حاصل تھیوݨ آلیاں ترسیلات 19.7 فیصد ودھارے دے نال 3.38 ارب ڈالر تئیں پڄ ڳئیاں جڈانجو فری لانسنگ دے ذریعے حاصل تھیوݨ آلی برآمدی آمدݨ 51 فیصد ودھارے دے بعد 856 ملین ڈالر تئیں ونڄ پڄی ۔ ایں طرزیح فائیو جی سپیکٹرم دی کامیاب نیلامی توں تقریباً 510 ملین ڈالر حاصل تھئے جیڑھے جو پاکستان دی ڈیجیٹل تبدیلی دے سفر اچ ہک اہم سنگِ میل ہن۔سماجی شعبے دی کارکردگی دا جائزہ پیش کریندے ہوئیں وزیرِ خزانہ آکھیے جو شرحِ خواندگی ودھ تے 63 فیصد تھی ڳئی جڈانجو سکولاں اچ حاضری دی شرح 67 فیصد تئیں پڄ ڳئی اے۔ ملک اچ سکول توں ٻاہر ٻاراں دی تعداد اچ کمی واقع تھئی جڈانجو اوسط متوقع عمر ودھ تے 67.8 سال تے حفاظتی ٹیکہ جات دی کوریج 73 فیصد تئیں پڄ ڳئی۔ انھاں آکھیے جو حکومت جامع تے پائیدار ترقی دے وژن دے تحت سماجی تحفظ دے پروگراماں کوں مزید مضبوط بݨیندی پئی اے۔ مالی سال دے دوران غریب دوست اخراجات 4.66 کھرب روپے تئیں پڄ ڳئے جڈانجو بے نظیر انکم سپورٹ پروگرام سودھے مختلف فلاحی منصوبیں دے ذریعے کمزور تے مستحق طبقات دی معاونت جاری رکھی ڳئی۔موسمیاتی تبدیلی دے خطرات دا ذکر کریندے وزیرِ خزانہ آکھیے جو پاکستان عالمی کاربن اخراج اچ ہک فیصد توں وی گھٹ حصہ پیندے لیکن ایں دے باوجود موسمیاتی تبدیلی توں ساریں توں زیادہ متاثر تھیوݨ آلے ملکاں اچ شامل اے۔ انھاں ݙسائے جو 2025ء دی چھل توں 822 ارب روپے توں ودھ دا ضیان تھئے تے لکھاں لوک متاثر تھئے جیں توں موسمیاتی مزاحمت، ماحولیاتی تحفظ تے پائیدار ترقی دی اہمیت مزید ودھ ڳئی اے۔ وزیرِ خزانہ ایں عزم دا اظہار کیتا جو حکومت معاشی استحکام کوں برقرار رکھݨ، برآمدات ودھاوݨ، سرمایہ کاری دے ودھارے ، پیداواری صلاحیت اچ ودھارے ، روزگار دے موقع پیدا کرݨ تے عوام دے معیارِ زندگی کوں بہتر بݨاوݨ کیتے اصلاحاتی عمل جاری رکھیسی تاں جو آوݨ آلے سالاں اچ پاکستان پائیدار تے جامع معاشی ترقی دے اہداف حاصل کرسڳے۔