پاکستان دی معیشت بحالی دے مرحلے اچ داخل تھی چکی اے، وفاقی وزیر خزانہ محمد اورنگزیب دا بلوم برگ کوں انٹرویو

اسلام آباد۔15 جون (اے پی پی)وفاقی وزیر خزانہ و محصولات سینیٹر محمد اورنگزیب آکھیے جو پاکستان دی معیشت بحالی دے مرحلے اچ داخل تھی چکی اے، آئندہ مالی سال دے وفاقی بجٹ اچ واضح طور تے معاشی سمت دا تعین کر ݙتا ڳئے۔ بلوم برگ کوں انٹرویو ݙیندے ہوئیں وزیر خزانہ آکھیا جو پاکستانی معیشت بحالی دے مرحلے اچ داخل تھی چکی اے، معاشی نمو اچ تیزی اتے مہنگائی اچ کمی آندی پئی اے۔ انھاں آکھیا جو مالیاتی شعبے دے حوالے نال پاکستان دی صورتحال حوصلہ افزا اے، مالیاتی خسارہ تاریخ دی کم ترین سطح تے آ چکیے اتے اساں بنیادی سرپلس حاصل کرݨ اچ کامیاب تھی ڳئے ہیں۔ وزیر خزانہ آکھیا جو زرمبادلہ دے ذخائر دے اعتبار نال پاکستان کولو کم از کم ترائے مہینے دی درآمدات دے مساوی ذخائر موجود ہین، ہݨ ساکوں برآمدات تے مبنی معاشی نمو دو ودھݨا ہوسی۔ انھاں آکھیا جو آئندہ مالی سال دے وفاقی بجٹ اچ اساں واضح طور تے سمت دا تعین کر ݙتے جو ہݨ اساں معاشی استحکام دے مرحلے توں نکل تے پائیدار اتے وسعت پذیر اقتصادی ترقی دو کیویں پیش قدمی کریسوں۔