جنگ مکݨ دے بعد پاکستان 2027ء کیتے اپݨے اقتصادی تخمینیاں اچ بہتری ڳھن آ سڳدے، سپلائی چینز معمول تے ولݨ اچ کڄھ ویلھا لڳسی، وفاقی وزیرِ خزانہ محمد اورنگزیب دا رائٹرز کوں انٹرویو

اسلام آباد۔16 جون(اے پی پی)وفاقی وزیرِ خزانہ و محصولات سینیٹر محمد اورنگزیب آکھیے جو جنگ مکݨ دے بعد پاکستان 2027ء کیتے اپݨے اقتصادی تخمینیاں اچ بہتری ڳھن آ سڳدے، سپلائی چینز معمول تے ولݨ اچ کڄھ ویلھا لڳسی، وزیرِ خزانہ اے ڳالھ منگل کوں برطانوی خبر رساں ادارے “رائٹرز” کوں انٹرویو ݙیندے آکھی۔ محمد اورنگزیب آکھیے جو جنگ اچ توانائی دے بنیادی ڈھانچے کوں پڄݨ والے نقصانات پاروں سپلائی دے نظام کوں معمول تے آوݨ اچ ویلھا لڳسی، ایں تنازعے مہنگائی دی شرح کوں ولا ڈبل ڈیجٹ اچ پچا ݙتے۔ وزیرِ خزانہ آکھیا جو اساں جائزہ ڳھندے پئے ہیں ڄیکر تنازع ٻیا ودھدے تاں ایںدے بالواسطہ اتے ثانوی اثرات نال کیویں نمٹا ویندا، توانائی دے بنیادی ڈھانچے کوں نقصان پڄیے، تہوں سپلائی چینز کوں معمول تے واپس آوݨ اچ کڄھ ویلھا لڳسی۔ وزیرِ خزانہ نے آکھیا جو انھاں کوں آئندہ سال کیتے اقتصادی تخمینیاں اچ بہتری دے امکانات ݙسدے پئن ٻھل بجٹ تے نظرثانی کرݨا ایں ویلھے اڳونہا ہوسی۔ انھاں آکھیا جو پاکستان مالی سال 2027ء اچ بیرونی قرضیاں دے مجموعی حجم ودھائے بغیر کریڈیٹر پروفائل اچ تبدیلی ڳھن آوݨ کیتے تجارتی قرضیاں توں فیدہ چا سڳدن، اساں ݙیکھݨ چاہندے ہیں جو کڄھ ݙوطرفہ قرضیاں دی ڄاہ تجارتی ذرائع توں حاصل شدہ فنانسنگ ڳھدی ونڄ سڳدی اے، ساݙا بیرونی قرضیاں دے مجموعی حجم اچ اضافہ کرݨ دا کوئی ارادہ نئیں۔ وزیرِ خزانہ آکھیا جو پاکستان پچھلے مہینے متحدہ عرب امارات دے 3.4 ارب ڈالر دے ݙوطرفہ ڈیپازٹس واپس کیتن ٻھل اماراتی کمرشل بینکاں توں وی مالی معاونت حاصل کیتی گئی جیڑھی قرض خواہاں دے ایں نویں ڈھانچے دی عکاسی کریندی اے جیکوں حکومت مزید باضابطہ شکل ݙیوݨ چاہندی اے۔ انھاں آکھیا جو حکومت دی فوری ترجیح دفاعی اخراجات تے وسائل دی مناسب تقسیم اے کیوں جو پاکستان دیاں ݙو سرحداں ایں ویلھے فعال نوعیت دے سلامتی چیلنجز دا سامݨا کریندیاں پئن۔ کرپٹو کرنسی، ٹوکنائزیشن اتے ڈیجیٹل اثاثیاں دے تبادلے دے پلیٹ فارمز دے حوالے نال وزیرِ خزانہ آکھیا جو حکومت انھاں شعبیاں کوں ٹیکس نیٹ اچ گھن آوݨ توں پہلے انھاں کیتے مناسب ضابطہ سازی اتے ریگولیٹری فریم ورک متعارف کریسی۔ جݙاں اے شعبہ باضابطہ اتے منظم تھی ویسی تاں ایں توں حاصل تھیوݨ آلی آمدݨ تے ٹیکس لایا ونڄ سڳسی، کہیں مرحلے تے ساکوں ایکوں ٹیکس نظام دے دائرہ کار اچ گھن آوݨا ہوسی، ٻھل فی الحال ایندے کیتے مناسب ویلھا نئیں۔