آئی سی سی ویمنز ٹی20 ورلڈ کپ؛ پاکستان کوں جنوبی افریقہ ہرا ݙتے

لاہور۔18 جون (اے پی پی) آئی سی سی ویمنز ٹی ٹونٹی ورلڈ کپ 2026 دے گیارہویں میچ اچ جنوبی افریقہ ویمنز ٹیم پاکستان ویمنز کوں 2 وکٹاں توں ہرا ݙتے۔ قومی ٹیم اپݨا پہلا میچ وی بھارت توں ہر ڳئی ہئی۔ برمنگھم اچ کھیݙے ڳئے میچ اچ قومی ٹیم چنڳی کارکردگی نا ݙکھا سڳی، ہک ویلھے صرف 45 دے سکور تے 7 کھلاری آئوٹ تھی ڳیاں ہن بھل کپتان ثنا فاطمہ اتے طوبیٰ حسن شاندار شراکت ٻݨائی، کپتان فاطمہ ثنا زور دار ففٹی لائی اتے سکور 127 تئیں پچا ݙتا۔ انہاں میچ اچ 55 سکور ٻݨاعن اتے 3 وکٹاں وی ڳھدن ٻھل اپݨی ٹیم کوں جتوا نئیں سڳیاں۔ اے آئی سی سی ویمنز ٹی20 ورلڈ کپ دی تاریخ اچ ناویں وکٹ دی سب توں وݙی شراکت اے۔ جنوبی افریقہ دی ٹیم اے ہدف 16.5 اوورز اچ 8 وکٹاں دے نقصان تے پورا کر ڳھدا۔ انیری ڈرکسن 35 ڳینداں تے 52 رنز دی جارحانہ اننگز کھیݙی۔ پاکستان ولوں کپتان فاطمہ ثنا3، سعدیہ اقبال اتے طوبی حسن 2، 2 کھلاڑیاں کوں آؤٹ کیتا۔ جنوبی افریقہ ولوں ماریزان کپ 3 وکٹاں ڳھدن۔ میچ دی بہترین کھلاڑی دا ایوارڈ انیری ڈرکسن کوں ݙتا ڳیا۔ پاکستان ویمن ٹیم اب اپنا اگلا میچ 20 جون کوں بنگلہ دیش دے خلاف ہیمپشائر بال، ساؤتھمپٹن اچ کھیݙسی۔