معاشی اتے اقتصادی بحالی کیتے قومی اتفاقِ رائے اہم، معاشی اعداد و شمار تے اشاریے عالمی معیار دے مطابق ہین، وفاقی وزیرِ خزانہ

اسلام آباد۔20 جون(اے پی پی)وفاقی وزیرِ خزانہ و محصولات، سینیٹر محمد اورنگزیب معاشی اتے اقتصادی بحالی کیتے قومی اتفاقِ رائے کوں اہم قرار ݙیندے آکھیے جو معاشی اعداد و شمار اتے اشاریے مروجہ طریقہ کار دے مطابق بین الاقوامی معیار کون سامݨے رکھ تے ٻݨائن، بجٹ اچ تنخواہ دار طبقے، زراعت، صنعت اتے برآمدات تے مبنی نمو کیتے جامع اقدامات کیتن، حکومت متوازن، ترقی دوست اتے معیشت کوں استحکام ݙیوݨ والا بجٹ ݙتے، عوام کوں ریلیف ملݨ دی شروعات تھی چکی اے۔ قومی اسمبلی دے اجلاس اچ آوݨ والے مالی سال دے وفاقی بجٹ اتے مالیاتی بل 2026-27 تے عام بحث کوں نمٹیندے وزیرِ خزانہ بجٹ دستاویزات اچ مبینہ تضادات سانڳے معاملہ چاوݨ اتے استحقاق دی تحریک پیش کرݨ تے اراکینِ قومی اسمبلی عظیم الدین زاہد اتے خواجہ شیراز محمود دا شکریہ ادا کیتے۔ انہان یقین ݙوایا جو پاکستان بیورو آف شماریات نیشنل اکاؤنٹس کمیٹی دی تیاری دے طریقہ کار اچ کوئی تبدیلی نئیں کیتی، سارے اعداد و شمار مالی سال 2015-16 کوں بیس ایئر بݨا تے، اقوامِ متحدہ دے سسٹم آف نیشنل اکاؤنٹس دے مطابق ٻݨائن، اے اعداد و شمار نیشنل اکاؤنٹس کمیٹی دے اجلاس اچ منظور کیتے ویندن جیںدے اچ وفاقی و صوبائی حکومتاں، اسٹیٹ بینک آف پاکستان، ماہرینِ معیشت، جامعات اتے ٻئے متعلقہ اداریاں دے نمائندے وی ہوندن۔ حقیقی جی ڈی پی معاشی سرگرمیاں اچ تھیوݨ والی حقیقی تبدیلی کوں قیمتاں دے اثرات توں پاک کر تے ناپیا ویندے، ایں کیتے 3.7 فیصد شرحِ نمو کوں 2015-16 دی مستقل قیمتاں تے ڳݨیا ڳئے، جیڑھا عالمی سطح تے منیا ہویا معیار اے۔ ݙوجھے پاسے معمولی جی ڈی پی گروتھ موجودہ مارکیٹ قیمتاں تے شمار کیتی ویندی اے اتے ایکوں اوسط شرحِ مبادلہ نال امریکی ڈالر اچ تبدیل کیتا ویندے۔ ایں بنیاد تے مالی سال 2025-26 اچ پاکستان دی معیشت دا حجم تقریباً 452 ارب امریکی ڈالر رہݨ دا تخمینہ پیش کیتے۔ ایویں ہی فی کس آمدنی دا تعین وی موجودہ قیمتاں، مجموعی قومی آمدنی تے 2023 دی مردم شماری دے بعد جاری کردہ آبادی دے تخمینیاں دی بنیاد تے کیتا ویندے، میں ٰواضح کراں جو نہ تاں طریقہ کار تبدیل تھئے اتے نہ ہی اعداد و شمار مرتب کرݨ دے اصول بدلیے ڳئن۔ ڄیکر کوئی معزز رکن مزید تفصیل چاہوے تاں ساریاں متعلقہ دستاویزات اتے حوالہ جات ݙیوݨ کیتے تیار ہیں۔ وزیرِ خزانہ آکھیے جو خطے تے کھنݙݨ آلے جنگ بدل چھت چکین، امن ول آئے، امریکا ایران وچال ثالثی کیتے پاکستان دا کردار مثالی اتے سفارتی سطح تے ہک وݙی کامیابی اے جیکوں پورا جڳ منیدا پئے۔ انہاں بجٹ اچ حصہ ڳھنݨ آلے سارے ڄکومتی اتے اپوزیشن ارکان دا شکریہ ادا کریندے آکھیے جو ارکان دیاں کئی تجویزاں کوں فنانس بل 2026 دا حصہ ٻݨاوݨ دا فیصلہ کیتے، کڄھ بجٹ اقدامات تے تحفظات اتے تجاویز وی سامݨے آئن، ڄیکوں حکومت پوری سنجیدگی نال سݨیے اتے انھاں تے غور کیتے، ہݨ تئیں ڄیڑھی رائے سامݨے آئی اے، او اے ھے جو اے ہک متوازن، ترقی دوست اتے معیشت کوں استحکام ݙیوݨ والا بجٹ اے، حکومت پچھلے بجٹ اچ ہی اپݨی معاشی سمت اتے اصلاحاتی ایجنڈا واضح کر ݙتا ہئی جیندے نال ہݨ تئیں مسلسل پیش رفت تھئی اے، معاشی اشاریے بہتر تھئی اے، اساݙی معیشت استحکام دو ویندی پئی اے، وݙیاں صنعتاں دی پیداوار اچ تقریباً 6.5 فیصد دی نمو ریکارڈ کیتی ڳئی اے جیڑھی چار سالاں دی بلند ترین شرح اے، ایویں ہی اساݙا بیرونی شعبہ وی مستحکم تھئے۔ ایں سال وی پہلے یارہاں مہینیاں اچ وی کرنٹ اکاؤنٹ سرپلس رہے جیڑھا معیشت کیتے ہک حوصلہ افزا اے۔ وزیرِ خزانہ آکھیا جو سمندر پار مقیم پاکستانی برادری توں امید اے جو اے مالی سال مکݨ تئیں ترسیلاتِ زر 41 ارب امریکی ڈالر دے ہدف توں وی تجاوز کر ویسن، جیڑھا ملکی تاریخ دا ہک نواں ریکارڈ ہوسی۔ وزیرِ خزانہ آکھیا جو اساݙا برآمدی شعبہ مسلسل بہتری دو ویندا پئے، بالخصوص ویلیو ایڈڈ برآمدات ودھ ترقی کریندے پئن، آئی ٹی برآمدات اچ تقریباً 20 فیصد اضافہ تھئے ڄݙاں جو مجموعی آئی ٹی برآمدات 4.5 ارب امریکی ڈالر توں تجاوز کرݨ دی توقع اے، جیڑھی ان شا اللہ ہک نواں قومی ریکارڈ ٻݨسی۔ نوجوان فری لانسرز 1.6 ارب ڈالر دا ریکارڈ زرمبادلہ ملک اچ گھن آوݨ اچ اہم کردار ادا کیتے۔ وزیرِ خزانہ آکھیا جو حکومت اتے ایں بجٹ دا بنیادی مقصد ہک اینجھی برآمدات تے مبنی، پائیدار اتے جامع معاشی ترقی دا حصول اے، سرمایہ کاری کوں فروغ ملے اتے ملک اچ روزگار دے نویں مواقع پیدا تھیون، اساں بوجھ پاوݨ دی بجائے ٹیکس دی وسعت تے گہرائی دی حکمتِ عملی اختیار کیتی اے، ایں دے تحت موجودہ ٹیکس دہندگان تے مزید بوجھ پاوݨ دی بجائے ٹیکس نیٹ کوں وسیع کیتا ویسی اتے ایںدی بنیاد کوں مضبوط ٻݨایا ویسی۔ انہاں آکھیا جو تنخواہ دار طبقے، چھوٹے کاروباروں، صنعت، برآمدی شعبے تے تعمیراتی شعبے تے ٹیکس دا بوجھ گھٹ کیتا ڳئے، ایں طرحاں برآمدی شعبے تے زرعی شعبے کیتے رعایتی قرضیاں دی فراہمی کوں یقینی بݨایا ڳئے، ڄݙاں جو ٹیکس نیٹ کوں وسعت ݙیوݨ کیتے ریٹیل سیکٹر کوں ڈیجیٹل نظام دے ذریعے ٹیکس دے دائرے اچ گھن آوݨ اتے ٹیکس قوانین اتے عملدرآمد تے نفاذ کوں مزید مؤثر ٻݨاوݨ کیتے جامع اصلاحات متعارف کرائیاں ڳئن۔ ٹیکس نظام اچ بنیادی اصلاحات نال ٹیکس پالیسی کوں ٹیکس انتظامیہ توں انڄھ کیتے، حکومت ہک نواں ٹیکس آپریٹنگ ماڈل متعارف کرویندی پئی اے، جیںدے نال ٹیکس دہندگان تے ٹیکس افسران وچال براہِ راست رابطے کوں گھٹ توں گھٹ کیتا ویسی۔ آڈٹ، تشخیص اتے ٻیاں کارروائیاں زیادہ تر خودکار اتے فیس لیس نظام دے ذریعے کیتاں ویسن تاں جو مصنوعی ذہانت، ڈیجیٹل رجسٹریشن اتے جدید ٹیکنالوجی نال صوابدیدی اختیارات دا خاتمہ، ہراسانی دے امکانات اچ کمی، شفافیت دا فروغ اتے ٹیکس قوانین تے رضاکارانہ عملدرآمد کوں یقینی ٻݨایا ونڄے۔ انہاں آکھیا جو ایف بی آر دے معاملیاں کوں تناظر اچ ݙیکھݨا ضروری اے، موجودہ صرف پچھلے ݙو سالاں اچ تقریباً 14 ارب امریکی ڈالر دے اضافی ٹیکس محصولات حاصل کیتن، جیڑھی ہک غیر معمولی کامیابی اے، حکومت مالی وسائل دی مؤثر فراہمی کوں معاشی حکمتِ عملی دا بنیادی ستون ٻݨائے، تاں جو ترقیاتی منصوبیاں، سماجی شعبیاں اتے قومی معیشت کوں مضبوط کیتا ونڄے۔ زراعت دے شعبے اچ ترقیاتی پیکجز دا اعلان کیتے، زرعی پیداوار ودھاوݨ کیتے مربوط زرعی سکیم دے تحت 300 ارب روپے دے بلاسود اتے آسان شرائط تے قرضے ݙتے ویندے پئن۔ ایں سکیم نال تقریباً ساݙھے ست لکھ چھوٹے کسان مستفید تھیسن، ایویں زرعی شعبے اچ مالی معاونت کیتے 109 ارب روپے توں زائد دے قرضیاں دا منصوبہ اے، کھاد خصوصاً یوریا تے تقریباً 10 ارب روپے دی سبسڈی ݙتی ویندی پئی اے، وفاقی ترقیاتی پروگرام دے تحت زراعت تے لائیو اسٹاک دے منصوبیاں کیتے 4.2 ارب روپے مختص کیتے ڳئن۔ سبسڈی تے رسک شیئرنگ دے تحت تقریباً 5 ارب روپے مختص کیتے ڳئن۔ ایویں نجی شعبے دے اشتراک نال کولڈ اسٹوریج دے منصوبے وی شروع کیتن جنھاں تے تقریباً 7.1 ارب روپے لاگت آسی۔ معیشت دے شعبے ودھاوݨ تے توجہ اے، سرکاری ملازمین دیاں تنخواہیں، پنشنز تے گھٹ توں گھٹ اجرت اچ اضافہ کیتا ڳئے۔ پنشنرز دی سہولت کیتے پروف آف لائف سرٹیفکیٹ دے نظام کوں جدید ٻݨایا ڳئے۔ وزیرِ خزانہ آکھیا اساݙی معاشی اتے اقتصادی بحالی کیتے قومی اتفاقِ رائے ݙاݙھی اہمیت رکھدے۔ میں سارے فریقین کوں آکھساں جو او معیشت دی مزید ترقی کیتے ہر ممکن تعاون جاری رکھن۔