پاکستان کرکٹ ٹیم ویسٹ انڈیز دے دورے کیتے 13 جولائی کوں اسلام آباد توں روانہ تھیسی، ترجمان پی سی بی

لاہور۔29 جون (اے پی پی) پاکستان کرکٹ ٹیم ویسٹ انڈیز دے دورے کیتے 13 جولائی کوں اسلام آباد توں روانہ تھیسی، جِتھاں قومی ٹیم ݙو ٹیسٹ میچاں دی سیریز اچ میزبان ٹیم دا سامݨا کریسی۔ ترجمان پی سی بی دے مطابق قومی ریڈ بال سکواڈ 8 جولائی کوں اسلام آباد اچ جمع تھیسی، ڄݙاں جو ہیڈ کوچ سرفراز احمد دی نگرانی اچ ٹیم دورے دی تیاریاں دا آغاز کریسی۔ لاہور اچ جاری ریڈ بال ٹریننگ کیمپ 2 جولائی کوں مُکݨ دا امکان اے، جئیں دے بعد منتخب کھڈاری اسلام آباد رپورٹ کریسن۔ ترجمان دے مطابق پاکستان کرکٹ بورڈ ویسٹ انڈیز تے انگلینڈ دے مسلسل ٹیسٹ دوریاں کیتے 17 رکنی مشترکہ سکواڈ دا اعلان کریسی تانجو ݙوہائیں سیریز کیتے ہکی ٹیم دستیاب راہوے۔ ویسٹ انڈیز دے خلاف پہلا ٹیسٹ میچ 25 جولائی توں کھیڈیا ویسے، ڄݙاں جو ݙوجھا تے آخری ٹیسٹ 2 اگست کوں شروع تھیسی۔ ایں دے بعد قومی ٹیم انگلینڈ دا رخ کریسی، جِتھاں ترائے ٹیسٹ میچاں تے مشتمل سیریز دا آغاز 19 اگست توں تھیسی۔