ڈپٹی کمشنر نال متحدہ مرکزی انجمنِ تاجران بہاولپور دے وفد دی ملاقات

بہاولپور۔2 جولائی (اے پی پی) ڈپٹی کمشنر سید حسن رضا نال متحدہ مرکزی انجمنِ تاجران بہاولپور دے وفد ملاقات کیتی تے محرم الحرام دے دوران ضلع اچ امن و امان دے قیام، صفائی ستھرائی، ٹریفک مینجمنٹ تے شہری سہولتاں ݙیوݨ کیتے ضلعی انتظامیہ دے پاسوں کیتے ڳئے مثالی انتظامات تے انھاں کوں خراجِ تحسین پیش کیتا۔ ملاقات اچ ایڈیشنل ڈپٹی کمشنر ریونیو شگفتہ جبیں وی موجود ہن جݙاں جو متحدہ مرکزی انجمنِ تاجران بہاولپور دے وفد دی قیادت مرکزی صدر حافظ راؤ محمد خرم سلیم کیتی۔ وفد اچ احسان اللہ راحت، علامہ عبدالرزاق شائق، نسیم عباس بخاری، ممبر ڈسٹرکٹ امن کمیٹی تقی نقوی، مختلف مکاتبِ فکر دے علمائے کرام تے تاجر تنظیماں دے ٻئے نمائندے وی شریک ہن۔ایں موقع تے وفد آکھیا جو ڈپٹی کمشنر سید حسن رضا دی قیادت اچ محرم الحرام توں پہلے وقتی تے جامع منصوبہ بندی کیتی ڳئی جیں پاروں ضلعی انتظامیہ، پولیس، ریسکیو، بلدیاتی اداریں تے ٻئے متعلقہ محکمیں آپت دے اشتراک نال فرائض انجام ݙتے۔ نتیجتاً ضلع اچ امن و امان دی صورتحال تسلی بخش رہی، جلوساں تے مجالس دے رستیں تے صفائی ستھرائی دے بہترین انتظامات کیتے ڳئے، ٹریفک دی روانی برقرار رہی تے عزاداراں سودھے شہریاں کوں ہرممکن سہولیات ݙتیاں ڳیاں۔ تاجر برادری دے نمائندیں آکھیا جو محرم الحرام جیھے حساس موقع تے ضلعی انتظامیہ دی مربوط حکمتِ عملی تے سارے اداریں وچال مؤثر رابطہ قابلِ تعریف رہیا۔ایں موقع تے ڈپٹی کمشنر بہاولپور سید حسن رضا متحدہ مرکزی انجمنِ تاجران تے مختلف مکاتبِ فکر دے علماء کرام دے تعاون دی تعریف کریندے آکھیے محرم الحرام دے دوران امن و امان دے قیام، مذہبی ہم آہنگی دے ودھارے تے شہری سہولتاں ݙیوݨ اچ تاجر برادری ذمہ واری، نظم و ضبط تے بھرپور تعاون دا مظاہرہ کیتا جیڑھا تعریف دے قابل اے انھاں آکھیا جو ضلعی انتظامیہ عوامی خدمت دے جذبے دے تحت سارے اسٹیک ہولڈرز، تاجر برادری، علماء کرام، امن کمیٹی، پولیس تے ٻئے متعلقہ اداریں دے نال نیڑے رابطہ برقرار رکھیندیں اڳوں وی شہریاں کوں بہترین سہولتاں ݙیوݨ، امن و امان دے استحکام تے آپت دے تعاون دے ودھارے کیتے مؤثر اقدامات جاری رکھیسی۔