ملتان۔وہاڑی ݙوپاسے سڑک جنوبی پنجاب دا مثالی گرین کوریڈور بݨسی، کمشنر ملتان

ملتان۔2 جولائی (اے پی پی) کمشنر ملتان عامر کریم خاں آکھیے جو ملتان، وہاڑی ݙوپاسے سڑک جنوبی پنجاب دا مثالی گرین کوریڈور بݨسی۔ تفصیل موجب کمشنر عامر کریم خاں دی صدارت اچ ملتان۔وہاڑی ݙوپاسے سڑک تے شجرکاری تے گرین بیلٹ منصوبے دا جائزہ اجلاس تھیا جیں اچ متعلقہ محکمیں دے افسراں شرکت کیتی۔ ایں موقع تے ڳالھ کریندے کمشنر ملتان آکھیا جو وزیرِاعلیٰ پنجاب مریم نواز دے وژن موجب ترقیاتی منصوبیں دے نال ماحول دوست شجرکاری کوں وی یقینی بݨایا ویسے۔ انھاں ہدایات جاری کریندیں آکھیا جو وقتی خوبصورتی دے بجائے پائیدار شجرکاری کوں ودھارا ݙتا ونڄے تے مقامی آب و ہوا نال ہم آہنگ، گھٹ پاݨی اچ بہتر نشوونما پاوݨ آلے ٻوٹیں کوں ترجیح ݙتی ونڄے۔عامر کریم خاں آکھیا جو ملتان۔وہاڑی روڈ تے شجرکاری دے نال ٻوٹیں ݙیکھ بھال ،آبپاشی، بقا دی شرح تے گرین بیلٹس دی مستقل ݙیکھ بھال کوں یقینی بݨایا ونڄے، جݙاں جو سڑک دے ڈیوائیڈرز، گرین بیلٹس تے ٻئے انفراسٹرکچر کوں ضیان پڄاوݨ آلیں دے خلاف سخت قانونی کارروائی کیتی ویسے۔ دورانِ اجلاس کمشنر ملتان کوں بریفنگ اچ ݙسایا ڳیا جو بابر چوک توں ٹٻہ سلطان پور تئیں 37 کلومیٹر حصے تے شجرکاری دی منصوبہ بندی مکمل کر ڳھدی ڳئی اے، منصوبے دے تحت 31.5 کلومیٹر سینٹر میڈین تے 14.2 کلومیٹر روڈ سائیڈ سودھے مجموعی طور تے 45.7 ایونیو کلومیٹر تے شجرکاری کیتی ویسے۔بریفنگ اچ مزید ݙسایا ڳیا جو ٻوٹیں وچال 10 فٹ دا فاصلہ رکھیا ویسے تے مجموعی طور تے 15,081 ہزار آرائشی تے چھاں آلے وݨ رادھے ویسن ،سینٹر میڈین اچ املتاس، بوٹل برش، کچنار، پنک ٹیبوبیا، ییلو ٹیبوبیا، لیگرسٹرومیا تے ٹرمینالیا جݙاں جو سڑک دے آسوں پاسوں پلکن، جیکرانڈا، پیپل، گل موہر، گلِ نشتر، نیم، بکائݨ تے ٹرمینالیا دے وݨ رادھے ویسن۔ ہر چار کلومیٹر بعد سینٹر میڈین تے ہر 1.4 کلومیٹر بعد روڈ سائیڈ تے مختلف قسماں دے وݨ لاتے شاہراہ کوں منفرد شناخت ݙتی ویسے، جݙاں جو یوٹرنز تے روڈکٹس دی خوبصورتی کیتے سپارا گراس، سلوری، لال جھاڑی، یوفوربیا، لال پتی تے ڈیورنٹا سودھے آرائشی ٻوٹے لاتے ویسن ۔ بریفنگ اچ ݙسایا ڳیا جو اے شجرکاری منصوبہ شاہراہ دی خوبصورتی اچ ودھارے، فضائی آلودگی اچ کمی، ماحولیاتی تحفظ تے گرین کور ودھاوݨ اچ اہم کردار ادا کریسی، جیں توں ملتان۔وہاڑی شاہراہ جنوبی پنجاب دی ہک مثالی ماحول دوست سڑک بݨ ویسی۔