حضرت بہاؤالدین زکریاؒ دے 787ویں عرس دی تیاریاں تیز، زائرین کیتے فول پروف سکیورٹی تے بہترین سہولیات دی ہدایت کر ݙتی، ڈپٹی کمشنر

ملتان۔ 08 جولائی (اے پی پی) شیخ الاسلام حضرت بہاؤالدین زکریا ملتانیؒ دا 787 واں سالانہ عرس (بمطابق چندر) 20 جولائی توں شروع تھیسی، جئیں کیتے ضلعی انتظامیہ انتظامات کوں حتمی شکل ݙیوݨا شروع کر ݙتے۔ ایں سلسلے اچ ڈپٹی کمشنر ڈاکٹر فیصل سلیم دی صدارت ضلعی محکمیاں دا اہم اجلاس تھیا جئیں اچ ایڈیشنل ڈپٹی کمشنر جنرل راشد محمود، اسسٹنٹ کمشنر سٹی ازکی سحر تے مختلف محکمیاں دے افسراں شرکت کیتی۔ اجلاس اچ پولیس، محکمہِ اوقاف، میونسپل کارپوریشن، ریسکیو 1122، ٹریفک پولیس تے ٻئے متعلقہ اداریاں عرس دے موقعے تے سکیورٹی، صفائی، ٹریفک تے ٻئے انتظامات دے حوالے نال تفصیلی بریفنگ ݙتی۔ ڈپٹی کمشنر ڈاکٹر فیصل سلیم ہدایت کیتی جو عرس دے دوران زائرین دی بہترین مہمان نوازی کوں یقینی بݨایا ونڄے اتے صفائی، سکیورٹی، طبی سہولیات تے ٻئے انتظامات اچ کہیں قسم دی کوتاہی نہ ورتی ونڄے۔ انھاں آکھیا جو بہترین انتظامات دے ذریعے ملک بھر توں آوݨ آلے عقیدت منداں تے ملتان دا مثبت تاثر قائم ہووݨا چاہیدے۔ انھاں متعلقہ محکمیاں کوں ہدایت کیتی جو زائرین کیتے قیام و طعام، پیوݨ دے صاف پاݨی، طبی امداد تے رہنمائی دیاں مناسب سہولیات فراہم کیتی ونڃن، جڈانجو ٹریفک دی روانی برقرار رکھݨ کیتے جامع ٹریفک پلان تے مکمل عملدرآمد کیتا ونڃے۔ ڈپٹی کمشنر آکھیا جو تمام ضلعی محکمے عرس دے ترائیں ݙینہ قلعہ کہنہ تے آپݨے کیمپس قائم رکھن تانجو کہیں وی ہنگامی صورتحال اچ فوری رسپانس ممکن بݨایا ونڃ سڳے۔ انھاں پولیس کوں ہدایت کیتی جو دربار شریف، اطراف دے علاقیاں تے زائرین دی قیام گاہواں دی مکمل سکریننگ کیتی ونڃے اتے فول پروف سکیورٹی انتظامات کوں ہر صورت یقینی بݨایا ونڃے تانجو عرس دیاں تقریبات پرامن تے خوش اسلوبی نال تھی سڳن۔