حکومت جنوبی پنجاب دے زرعی شعبے دی چنڳائی/ودھارے تے کاشتکاراں دی خوشحالی کیتے ممکنہ وسائل استعمال اچ گھن آندی پئی اے ، ایڈیشنل چیف سیکریٹری جنوبی پنجاب

ملتان۔ 18 جولائی (اے پی پی) ایڈیشنل چیف سیکریٹری جنوبی پنجاب فواد ہاشم ربانی ڈی ایچ اے ملتان اچ ݙو ݙینھ وار مینگو فیسٹیول دا افتتاح کریندیں آکھیے جو جنوبی پنجاب دا امب آپݨی مٹھاس، منفرد خوشبو تے لاجواب ذائقے پاروں دنیا اچ پاکستان دی سنڄاݨ بݨ چکئے، ڄݙاں جو جدید زرعی ٹیکنالوجی تے مؤثر مارکیٹنگ دے ذریعے امب دی برآمدات اچ ودھارا کرتے ملکی معیشت کوں مزید مستحکم بݨایا ونڄ سڳدے۔ڈی ایچ اے ملتان اچ منعقدہ افتتاحی تقریب اچ پراجیکٹ ڈائریکٹر ڈی ایچ اے ملتان بریگیڈیئر کاشف نعیم برکی مہمانِ خصوصی دا استقبال کیتا۔ فیسٹیول اچ زرعی ماہرین، کاشتکاراں، کاروباری شخصیات، فیملیز تے شہریاں دی ٻہوں وݙی تعداد شرکت کیتی۔ فیسٹیول اچ جنوبی پنجاب دے باغاں توں گھن آئے ڳئے امباں دیاں مختلف قسماں، جنھاں اچ دیسی، انور رٹول، چونسا، لنگڑا تے سندھڑی شامل ہن، نمائش کیتے پیش کیتیاں ڳئیاں، ڄݙاں جو امب توں تیار کیتیاں ڳیاں مختلف مصنوعات دے اسٹالز وی توجہ دا مرکز ریہے۔ایڈیشنل چیف سیکریٹری مختلف اسٹالز دا تفصیلی دورہ کیتا تے امب دے معیار دی تعریف کریندے آکھیا جو عالمی منڈیاں اچ مسابقت کیتے امب دی پیکجنگ کوں بین الاقوامی معیار موجب بݨاوݨ ویلھے دی اہم لوڑھ اے ۔ انھاں آکھیا جو حکومت جنوبی پنجاب دے زرعی شعبے دی چنڳائی/ودھارے تے کاشتکاراں دی خوشحالی کیتے سارے ممکنہ وسائل استعمال اچ گھن آندی پئی اے ، ڄݙاں جو زرعی یونیورسٹیاں تے تحقیقی اداریں دی سانجھ نال جدید تحقیق دے ثمرات براہِ راست کساناں تئیں پڄائے ونڄ سڳدن۔ انھاں خطے دے زرعی اثاثے کوں اجاگر کرݨ تے ڈی ایچ اے ملتان دی انتظامیہ دی کوششاں دی تعریف کریندے آکھیے ایجھے فیسٹیولز نہ صرف امب دی عالمی سطح تے تشہیر اچ معاون ثابت ہوندن بلکہ مقامی کاشتکاراں کوں وی بہتر تجارتی موقع ݙیندن۔