جنوبی کوریا دی قومی ہاکی ٹیم اج 27 جولائی توں 8 اگست تئیں پاکستان دا تاریخی دورہ کریسی

اسلام آباد۔27جولائی (اے پی پی) حکومتِ پاکستان دی دعوت تے جنوبی کوریا دی قومی ہاکی ٹیم اڄ 27 جولائی توں 8 اگست تئیں پاکستان دا تاریخی دورہ کریسی۔ سنوار دے ݙینہہ وزارتِ بین الصوبائی رابطہ ولوں جاری کردہ اعلامیے دے مطابق ݙوہائیں ملکاں وچال بین الاقوامی ٹیسٹ میچز اسلام آباد دے نصیر بندہ ہاکی اسٹیڈیم اچ کھیݙیے ویسن۔ اعلامیے اچ آکھیا ڳیا اے جو جنوبی کوریا دی ہاکی ٹیم دے دورے توں پاکستان اچ بین الاقوامی ہاکی دی سرگرمیاں دی بحالی کوں نویں تقویت ملسی۔ اے دورہ ملک اچ کھیݙاں دے فروغ توں متعلق وزیراعظم پاکستان دے وژن دی وی عکاسی کریندے۔ وزیراعظم دے معاونِ خصوصی برائے سیاسی امور سینیٹر رانا ثناءاللہ آکھیا جو جنوبی کوریا دی قومی ہاکی ٹیم دا دورہ پاکستان اچ قومی کھیݙ دی بحالی آلے پاسے تاریخی پیش رفت اے۔ انھاں آکھیا جو ایں دورے توں پاکستان دے پرامن تے محفوظ تشخص کوں عالمی سطح تے اجاگر کرݨ اچ مدد ملسی۔ وفاقی سیکرٹری محی الدین وانی آکھیا جو جنوبی کوریا دی ٹیم دا دورہ پاکستان دی اسپورٹس سفارت کاری تے ݙوپاسہ تعلقات دے فروغ اچ اہم کردار ادا کریسی۔ اعلامیے اچ آکھیا ڳئے جو حکومتِ پاکستان ولوں مہمان ٹیم کوں اعلیٰ سطح دی سکیورٹی، پروٹوکول تے انتظامی سہولیات فراہم کیتی ویسن۔