وزیرِ خزانہ دی صدارت ’’رسائی برائے مالیات‘‘ سٹیئرنگ کمیٹی دا پہلا اجلاس، ایکسیس ٹو فنانس پلان تے تیز رفتار عملدرآمد دی ہدایت

اسلام آباد۔27جولائی (اے پی پی) وفاقی وزیر برائے خزانہ تے محصولات سینیٹر محمد اورنگزیب وزیراعظم دے ایکسیس ٹو فنانس پلان 2026-2028 تے تیز رفتار عملدرآمد کیتے قائم رسائی برائے مالیات سٹیئرنگ کمیٹی دے پہلے اجلاس دی صدارت کیتی۔ اجلاس اچ چھوٹے تے درمیانے درجے دے کاروباری اداریاں، زراعت، انفارمیشن ٹیکنالوجی (آئی ٹی)، برآمدات، قابلِ تجدید توانائی تے ہاؤسنگ سمیت ترجیحی شعبیاں کیتے سستی تے آسان مالی سہولتاں دی فراہمی کوں یقینی بݨاوݨ دے اقدامات دا جائزہ گھدا ڳیا۔ اجلاس اچ ہک جامع بریفنگ پیش کیتی ڳئی جئیں اچ مجوزہ گورننس ڈھانچے، مخصوص اہداف، عملدرآمد دے مختلف مراحل، مالی شمولیت دے فروغ تے ترجیحی شعبیاں کیتے رعایتی قرضیاں تئیں رسائی ودھاوݨ دے اقدامات تے تفصیلی روشنی پاتی ڳئی۔ کمیٹی کوں ایس ایم ای فنانس ذیلی کمیٹی دی پیش رفت دا وی ݙسیا ڳیا جڈانجو حکومت دے اہم مالیاتی پروگراماں جنھاں اچ ذرخیز (آسان زرعی قرضہ)، آپݨا گھر سکیم تے پاکستان ایکسلریٹڈ وہیکل الیکٹریفکیشن (PAVE) شامل ہن، تے پیش رفت دا جائزہ گھدا ڳیا۔ منصوبے دا مقصد عوام کوں گھٹ لاگت الیکٹرک بائیکس تے ای رکشیاں دی فراہمی دے ذریعے ماحول دوست ٹرانسپورٹ آلے پاسے منتقل کرݨ اے۔ اجلاس اچ مجوزہ ترائے سطحی گورننس فریم ورک تے وی غور کیتا ڳیا جئیں دے تحت وزیراعظم کوں ماہانہ پیش رفت رپورٹ پیش کیتی ویسی، وفاقی وزیرِ خزانہ دی سربراہی اچ سٹیئرنگ کمیٹی ہر پندرہ ݙینہہ بعد سٹریٹجک جائزہ گھنسی جڈانجو مختلف شعبیاں دی ذیلی کمیٹیاں ہفتہ وار بنیاداں تے پیش رفت دا جائزہ گھسن۔ اجلاس اچ رپورٹنگ دے مجوزہ نظام، ریزولوشن ٹارگٹ ڈیٹس، منظم اسکیلیشن میکانزم تے باقاعدہ پیش رفت رپورٹس دے ذریعے جوابدہی تے نگرانی کوں ٻیا موثر بݨاوݨ تے وی ڳالھ کیتی ڳئی۔ وزیرِ خزانہ پیش رفت دی نگرانی کیتے ہک جامع ڈیش بورڈ دی تیاری دی ضرورت تے وی زور ݙتا۔اجلاس اچ حکومت دے نمایاں مالیاتی پروگراماں دی پیش رفت دا وی جائزہ گھدا ڳیا۔ ذرخیز (آسان زرعی قرضہ) پروگرام دے تحت درخواستاں، منظوریاں تے قرضیاں دی تقسیم دے رجحانات تے غور کیتا ڳیا۔اجلاس اچ وفاقی سیکریٹری خزانہ امداد اللہ بوسال، گورنر سٹیٹ بینک، چیئرمین سکیورٹیز اینڈ ایکسچینج کمیشن آف پاکستان (ایس ای سی پی)، چیئرمین پاکستان بینکس ایسوسی ایشن (پی بی اے)، چیف ایگزیکٹو آفیسر کارانداز پاکستان، وزارتِ خزانہ، سٹیٹ بینک آف پاکستان تے ایس ای سی پی دے سینئر حکام شرکت کیتی۔