واشنگٹن۔ 2 اگست (اے پی پی) امریکی صدر ڈونلڈ ٹرمپ آکھیا جو ایران تے مشرقِ وسطیٰ دے ٻئے ملکاں اساں توں درخواست کیتی اے جو اساں حملہ روک ݙیووں، کیونکہ ہک معاہدے دے بنیادی نکتاں تے اتفاق تھی ڳئے۔ بی بی سی دے مطابق امریکی صدر ٹروتھ سوشل تے جاری بیان اچ آکھیا جو امریکہ ایران دے خلاف ایہوجہی فوجی کارروائی کیتے مکمل طور تے تیار ہئی، جئیں دی شدت، …
مشرقِ وسطیٰ دے ملکاں دی درخواست تے ایران دے خلاف حملے دا منصوبہ موخر کر ݙتا، امریکی صدر
واشنگٹن۔ 2 اگست (اے پی پی) امریکی صدر ڈونلڈ ٹرمپ آکھیا جو ایران تے مشرقِ وسطیٰ دے ٻئے ملکاں اساں توں درخواست کیتی اے جو اساں حملہ روک ݙیووں، کیونکہ ہک معاہدے دے بنیادی نکتاں تے اتفاق تھی ڳئے۔ بی بی سی دے مطابق امریکی صدر ٹروتھ سوشل تے جاری بیان اچ آکھیا جو امریکہ ایران دے خلاف ایہوجہی فوجی کارروائی کیتے مکمل طور تے تیار ہئی، جئیں دی شدت، طاقت تے عسکری صلاحیت ݙوجھی عالمی جنگ دے بعد کݙاہیں نئیں ݙٹھی ڳئی۔ صدر ڈونلڈ ٹرمپ دے مطابق ایں مجوزہ معاہدے اچ آبنائے ہرمز کوں فوری، مکمل تے غیر مشروط طور تے کھولݨ تے ایران دے جوہری خطرے دا خاتمہ شامل اے۔ انھاں ٻیا آکھیا جو ایں درخواست دی بنیاد تے دنیا دے بہتر مستقبل تے ہک کامیاب و خوشحال ایران دی بقا دے کیتے تیزی نال معاہدہ طے کرݨ دی شرط تے مجوزہ حملہ منسوخ کرݨ تے اتفاق کیتے۔ امریکی صدر اے وی آکھیا جو ایں عزم اچ اسرائیل وی اساں نال شامل اے۔ ہݨ سبھ کم تے لگ ونڄن تے ایں معاہدے کوں مکمل کرن۔ امریکی صدر ڈونلڈ ٹرمپ ایں توں پہلے ایران کوں انتہائی سخت حملیاں دی دھمکی ݙیندیں ہوئیں آکھیا ہئی جو امریکہ ایران کوں ٻہوں بری طرحاں نشانہ بݨیسی جڈانجو امریکی میڈیا رپورٹ کیتا ہئی جو او ایران دے توانائی دے بنیادی ڈھانچے سمیت ٻئے اہداف تے فوری طور تے نویں وݙے حملیاں تے غور کریندے پئن۔ تاہم کجھ دیر پہلے ایران دے وزیرِ خارجہ عباس عراقچی دے پاکستان، ترکی تے سعودی عرب نال رابطیاں دے حوالے نال خبر سامݨے آئی ہئی جئیں اچ انھاں ولوں خبردار کیتا ڳیا ہئی جو ایران، امریکہ یا اسرائیل دی کہیں وی جارحیت دا فیصلہ کن جواب ݙیسی۔ نال ای ترکی ولوں وی مذاکرات تے خطے اچ دیرپا امن کیتے آپݨی سفارتی کوششاں جاری رکھݨ دے عزم دا اظہار کیتا ڳیا ہئی۔
