آئی بی سی سی اچ پاکستان دا 79واں یومِ آزادی قومی جوش تے جذبے نال منایا ڳیا

اسلام آباد۔14اگست  (اے پی پی)  انٹر بورڈز کوآرڈینیشن کمیشن (IBCC) ولوں آئی بی سی سی سیکریٹریٹ اسلام آباد اچ پاکستان دا 79واں یومِ آزادی قومی جوش و جذبے تے ملی جذبے دے نال منایا ڳیا۔ تقریب دے دوران ایگزیکٹو ڈائریکٹر آئی بی سی سی ڈاکٹر غلام علی ملاح یومِ آزادی دا کیک کٹیا۔ ایں موقعے تے ڳالھ مہاڑ کریندیں ہوئیں انہاں اکھیا جو مادرِ وطن دا تحفظ تے ایں دی خودمختاری دا دفاع ہر پاکستانی دی مشترکہ ذمہ واری اے۔ انہاں ایں عزم دا اعادہ کیتا جو قوم کوں متحد راہندے ہوئیں ملک دے خلاف کہیں وی خطرے یا جارحیت دے مقابلے اچ مضبوط ڈھال بݨݨ کیتے ہر ویلھے تیار راہݨا چاہیدے۔

طلبہ نال خطاب کریندیں ہوئیں ڈاکٹر غلام علی ملاح انہاں کوں محنت، نظم و ضبط، لگن تے عزم دے ذریعے مسلسل بہترین کارکردگی دے حصول دی تلقین کیتی۔ انہاں اکھیا جو پاکستان دا روشن مستقبل ہک تعلیم یافتہ، ہنرمند، باصلاحیت تے ذمہ دار نوجوان نسل نال وابستہ اے۔ انہاں ہنر تے مبنی تعلیم (Skills-Based Education) دی اہمیت تے زور ݙیندے ہئیں اکھیا جو طلبہ کوں مارکیٹ دی ضرورتاں نال ہم آہنگ عملی تے پیشہ ورانہ مہارتاں نال آراستہ کرݨ ویلھے دی اہم لوڑھ اے۔ ایں نال نہ صرف نوجواناں کیتے روزگار دے بہتر مواقع پیدا تھیسن بلکہ جدت، کاروباری صلاحیت تے قومی معیشت دے استحکام اچ وی مدد ملسی۔ ڈاکٹر غلام علی ملاح طلبہ تے زور ݙتا جو او تعلیم، مہارت، محنت تے قومی ذمہ داری کوں آپݨے مستقبل دی بنیاد بݨیندے ہوئیں پاکستان دی ترقی، خوشحالی تے استحکام اچ فعال کردار ادا کرن۔ تقریب دا اختتام آزادی دی حقیقی روح، قومی اتحاد، حب الوطنی تے ملک و قوم دی خدمت دے عزم دی تجدید دے نال تھیا۔