ملتان وچ یومِ آزادی دی مرکزی تقریب، پاکستان زندہ باد دے نعریں دی گج

ملتان (اے پی پی) شہرِ اولیاء وچ یومِ آزادی دی مرکزی تقریب ڈپٹی کمشنر دفتر وچ منعقد تھئی، جتھاں پاکستان زندہ باد دے نعریں دی گج وچ قومی پرچم لہرایا ڳئے۔ کمشنر ملتان عامر کریم خاں تے ڈپٹی کمشنر ڈاکٹر فیصل سلیم پرچم کشائی کیتی، جݙاں جو پولیس، ریسکیو 1122 تے سول ڈیفنس دے چاک و چوبند دستیں شاندار پریڈ دا مظاہرہ کریندے سلامی پیش کیتی۔ تقریب وچ سی پی او صادق علی ڈوگر، ایڈیشنل ڈپٹی کمشنرز، اراکینِ اسمبلی، سیاسی قیادت، سول سوسائٹی دے نمائندگان تے شہریاں بھرپور شرکت کیتی۔ پرچم کشائی توں پہلے سائرن وڄائے ڳئے تے شہدائے وطن کوں خراجِ عقیدت پیش کرݨ کیتے ہک منٹ سانڳے چُپ اختیار کیتی ڳئی ۔ تقریب دے دوران کمشنر عامر کریم خاں، ڈپٹی کمشنر ڈاکٹر فیصل سلیم تے سی پی او صادق علی ڈوگر فضا وچ پھوکڑیاں چھوڑ تے امن تے خوشحالی دا پیغام ݙتا، جݙاں جو کمشنر تے ڈپٹی کمشنر اراکینِ اسمبلی دے رلے جشنِ آزادی دا کیک وی کٹیا۔ ایں موقع تے کمشنر عامر کریم خاں آکھیا جو 14 اگست اساں کوں قربانیاں، جدوجہد تے حق دے علمبردار رہݨ دی یاد ݙویندے، اے ݙینھ ایں عہد دی تجدید دا ݙینھ اے جو پاکستان کوں امن، عدل تے ترقی دا گہوارہ بݨیسوں۔ انہاں اکھیا جو اساݙے بزرگاں حق تے سچ کیتے ہر قربانی ݙتی، جݙاں جو جشنِ آزادی بنیان المرصوص معرکہ حق دی فتح دے بعد نویں عزم دے نال منایا ویندا پئے۔ انہاں اکھیا جو حصولِ آزادی توں تحفظِ آزادی تئیں پاک فوج ثابت کیتے جو اساں ہک ہیسے تے جاڳدے پیوں۔ وطن دی سلامتی تے خودمختاری دے تحفظ کیتے پوری قوم متحد اے۔ ڈپٹی کمشنر ڈاکٹر فیصل سلیم آکھیا جو 14 اگست وطن دی حفاظت، ایمان، اتحاد تے قربانی دے جذبے کوں تازہ کرݨ دا ݙینھ اے۔ اڄ ہر شہری کوں وطنِ عزیز دی حفاظت، ترقی تے خوشحالی کیتے اپݨا کردار ادا کرݨ دا عہد کرݨا چاہیدے۔ انہاں اکھیا جو نویں نسل تئیں آزادی دا حقیقی پیغام پڄاوݨ دی لوڑھ اے تاں جو نوجوان قیامِ پاکستان دے مقصد، بزرگاں دی قربانیاں تے وطن دے تحفظ دی اہمیت توں آگاہ رہن۔