یادگارِفتح معرکہ حق وچ کامیابی، شہداء تے غازیاں دی لازوال داستان اے، صدرِ مملکت آصف علی زرداری دا یادگارِ فتح دی افتتاحی تقریب نال خطاب

اسلام آباد۔14 اگست (اے پی پی) صدرِ مملکت آصف علی زرداری آکھیے جو یادگارِ فتح معرکہ حق وچ کامیابی، شہداء تے غازیاں دی لازوال داستان اے، فیلڈ مارشل سید عاصم منیر دی ولولہ انگیز قیادت وچ مسلح افواج بھارت کوں عبرتناک شکست ݙتی، عالمی امن و استحکام کیتے پاکستان دے کردار دی دنیا معترف اے۔ انہاں اے ڳالھ یادگارِ فتح دی افتتاحی تقریب نال خطاب کریندے آکھی۔ تقریب وچ وزیراعظم محمد شہباز شریف، چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر، نائب وزیراعظم و وزیرِ خارجہ محمد اسحاق ڈار، چیئرمین سینیٹ سید یوسف رضا گیلانی، سپیکر قومی اسمبلی سردار ایاز صادق، سروسز چیفس، وفاقی وزراء، غیر ملکی سفارت کار، پنجاب تے خیبر پختونخوا دے گورنرز، وزیراعلیٰ پنجاب، ارکانِ پارلیمنٹ تے سول و عسکری حکام وی موجود ہن۔ صدرِ مملکت آکھیا جو چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر دی قیادت وچ پاکستان دی مسلح افواج معرکہ حق وچ بھارت کوں عبرتناک شکست ݙتی، یادگارِ فتح معرکہ حق وچ کامیابی، شہداء تے غازیاں دی لازوال داستان اے۔ انہاں اکھیا جو امن عمل وچ دنیا دے نال ہیسے۔ عالمی امن و استحکام کیتے پاکستان دے کردار دی دنیا معترف اے۔ صدرِ مملکت آکھیا جو ایران امریکا جنگ بندی وچ وزیراعظم محمد شہباز شریف، فیلڈ مارشل، نائب وزیراعظم تے وزیرِ داخلہ اہم کردار ادا کیتے، عالمی برادری دے نال رل تے دنیا دے امن تے خوشحالی کیتے بھرپور کردار ادا کریندے پیوں، امریکہ وی عالمی امن کیتے فیلڈ مارشل دی کوششاں دا معترف اے، امریکی صدر انہاں کوں بہترین فیلڈ مارشل قرار ݙتے، اسلامی ملکاں دے اتحاد کیتے پاکستان دا اہم کردار اے، شہید ذوالفقار علی بھٹو وی اسلامی کانفرنس وچ دنیا بھر دے مسلمان رہنماؤاں کوں اکٹھا کیتا ہئی، اساں پہلے وی کامیاب رہیوں تے اڳوں وی سرخرو تھیسوں۔ صدرِ مملکت آکھیا جو مکہ مشترکہ دفاعی معاہدہ وی وزیراعظم محمد شہباز شریف، نائب وزیراعظم محمد اسحاق ڈار تے فیلڈ مارشل سید عاصم منیر دی کاوشاں دا ثمر اے، کوئی وی جنگ نی چاہندا کیوں جو جنگاں توں صرف تباہی آندی اے، پاکستان دنیا وچ قیامِ امن کیتے کوششاں کرݨ آلیں دے نال کھڑے۔ انہاں اکھیا جو اکھنڈ بھارت دی ڳالھ کرݨ آلے بھل ویندن جو اساں مسلمان ہیسے تے اسلام برداشت دا درس ݙیندے، پاکستان وچ وسݨ آلی ہندو آبادی کوں ایں طرح مکمل آزادی حاصل اے جیویں انہاں کوں کہیں ٻئے ملک وچ اے۔ انہاں اکھیا جو میݙے والد وی کشمیر دے جہاد وچ حصہ ڳھدا، انہاں فلسطین تے غزہ دا ذکر کریندے اکھیا جو غزہ وچ نسل کشی کہیں صورت قابلِ قبول کائںی ، گریٹر اسرائیل دا خواب کݙاہیں پورا نہ تھیسی، آزاد فلسطینی ریاست قائد اعظم محمد علی جناحؒ دا خواب ہئی تے اساں انہاں دے خواب دی عملی تعبیر کیتے کوشاں ہیسے۔ انہاں اکھیا جو اساں کوں اپݨی آندی نسل دے روشن مستقبل کیتے بھرپور اقدامات کرݨے ہن، سماجی شعبے خصوصاً تعلیم تے توجہ ݙیوݨی ہوسی۔