سپریم کورٹ وچ یومِ آزادی دی پروقار تقریب، پریس روم دا افتتاح، آزادی دے نال حقوق دے تحفظ تے اداریں تے اعتماد دی ذمہ واری وی آندی اے: چیف جسٹس یحییٰ آفریدی

اسلام آباد۔14 اگست (اے پی پی) چیف جسٹس آف پاکستان جسٹس یحییٰ خان آفریدی اکھیے جو آزادی اپݨے نال اقدار دی پاسداری، حقوق دے تحفظ تے ریاستی اداریں تے شہریاں دے اعتماد کوں تکڑا بݨاوݨ دی مستقل ذمہ واری گھن آندی اے، قیامِ پاکستان کوں ممکن بݨاوݨ آلے وژن، قربانیاں تے عزم کوں خراجِ تحسین پیش کریندے ہوئے انہاں آکھیا جو یومِ آزادی اساں کوں اپݨی قومی تے آئینی ذمہ واریاں دی تجدید دا موقع ݙیندے۔ جاری اعلامیے موجب سپریم کورٹ آف پاکستان وچ 79ویں یومِ آزادی دے موقع تے پرچم کشائی دی پروقار تے جامع تقریب منعقد تھئی جیں وچ چیف جسٹس آف پاکستان جسٹس یحییٰ خان آفریدی، سپریم کورٹ دے معزز ججز، رجسٹرار، افسران، عملے تے انہاں دے ٻالاں شرکت کیتی۔ مساوات، شمولیت تے مذہبی ہم آہنگی دے آئینی عزم دے اظہار دے طور تے قومی پرچم مشترکہ طور تے لہرایا ڳیا۔ اقلیتی برادری نال تعلق رکھݨ آلے ٻالاں، چیف جسٹس آف پاکستان تے سپریم کورٹ دے معزز ججز قومی پرچم لہرایا جݙاں جو ہندو پنڈت، مسیحی پادری تے مسلم عالمِ دین وی پرچم کشائی وچ شریک تھئے۔ پولیس بینڈ قومی ترانے دی دھن پیش کیتی تے تقریب قومی جذبے تے وقار نال بھرپور رہی۔ مختلف مذہبی برادریاں دی شرکت ایں پیغام کوں اجاگر کیتا جو پاکستان اپݨے سارے شہریاں دا ھکو سواں وطن اے تے ملک دی طاقت ایں دے تنوع، اتحاد تے آئینی اقدار نال مشترکہ وابستگی وچ اے۔ چیف جسٹس یحییٰ خان آفریدی تقریب وچ شریک ٻالاں نال شفقت نال ملاقات تے ڳالھ کیتی تے انہاں کوں کورٹ روم نمبر ہک گھن ڳئے جتھاں ٻالاں کوں سپریم کورٹ دے عدالتی ماحول نال روشناس کرایا ڳیا۔ بعد اچ چیف جسٹس آف پاکستان، سپریم کورٹ دے معزز ججز تے ٻالاں یومِ آزادی دا کیک مشترکہ طور تے کٹیا، جیں یومِ آزادی دی مشترکہ خوشی تے قومی جذبے دی عکاسی کیتی۔ چیف جسٹس آف پاکستان یومِ آزادی دے موقع تے قوم تے قانونی برادری کوں مبارخ پیش کیتی تے قیامِ پاکستان کیتے ݙتیاں ونڄݨ آلیاں قربانیاں تے ایں دے پچھوں کارفرما وژن تے عزم کوں خراجِ تحسین پیش کیتا۔ ایں توں انڄ سپریم کورٹ آف پاکستان وچ میڈیا دی رسائی، شفافیت تے عوامی رابطے دے ودھارے کیتے پریس روم دا وی افتتاح کیتا ڳیا۔ پریس روم دا افتتاح چیف جسٹس آف پاکستان تے سپریم کورٹ دے معزز ججز دی موجودگی وچ صدر پریس ایسوسی ایشن آف سپریم کورٹ عمران وسیم تے جنرل سیکرٹری امانت رضا گشکوری کیتا۔ پریس روم دے قیام دا مقصد عدالتی کارروائی تے ادارہ جاتی سرگرمیاں دی وقتی تے مؤثر کوریج وچ کورٹ رپورٹرز کوں سہولت ݙیوݨ اے۔ نویں سہولت دے ذریعے کورٹ رپورٹرز کوں سپریم کورٹ وچ مختص تے سازگار ورک اسپیس دے نال نال عدالتی معلومات تک بہتر تے وقتی رسائی میسر آسی۔ پریس روم دا قیام میڈیا دی رسائی تے ادارہ جاتی شفافیت ودھاوݨ کیتے سپریم کورٹ دے جاری اقدامات دا حصہ اے۔