بلوچستان دے ضلع خاران اچ سکیورٹی فورسز دا کامیاب انٹیلی جنس بیسڈ آپریشن، 7 دہشت گرد جہنم واصل

اسلام آباد (اے پی پی) بلوچستان دے ضلع خاران اچ سکیورٹی فورسز کامیاب انٹیلی جنس بیسڈ آپریشن دے دوران 7 دہشت گرداں کوں جہنم واصل کر ݙتا۔ ردالفتنہ 3 دے تحت سکیورٹی فورسز خاران دے علاقے لجے اچ دہشت گرداں دی موجودگی دی اطلاع تے انٹیلی جنس بیسڈ آپریشن کیتا۔ سکیورٹی فورسز کارروائی دے دوران فتنہ الخوارج دے 7 دہشت گرداں کوں جہنم واصل کر ݙتا جݙاں جو کئی زخمی وی تھئن۔ سکیورٹی ذرائع دے مطابق دہشت گرداں دے ٹکاݨیاں توں جدید اسلحہ، بھاری مقدار اچ گولہ بارود، ٻیا جنگی سامان، 2 گاݙیاں تے ہک موٹر سائیکل برآمد تھئی اے۔ سکیورٹی فورسز آپریشن دے دوران فتنہ الخوارج دے دہشت گرداں دے ٹکاݨیاں کوں وی مکمل طور تے تباہ کر ݙتا۔ سکیورٹی ذرائع دے مطابق دہشت گرد خاران تے لجے اچ لوٹ مار، بھتہ خوری، اغواء برائے تاوان، ٹارگٹ کلنگ تے خودکش حملیاں دی منصوبہ بندی اچ ملوث ہن۔ سکیورٹی فورسز بلوچستان اچ آپریشن ردالفتنہ 3 دے تحت دہشت گردی دے مکمل خاتمے کیتے کارروائیاں دا سلسلہ جاری رکھیا ہوئے، آخری دہشت گرد دے خاتمے تئیں دہشت گرداں دا تعاقب جاری راہسی اتے انہاں کوں منطقی انجام تک پڄاوݨ کیتے تمام ضروری اقدامات کیتے ویسن۔