وزیرِ داخلہ دی صدارت اجلاس، ذیلی اداریاں توں ݙو سالہ ٹرانسفارمیشن پلان طلب

اسلام آباد (اے پی پی) وفاقی وزیرِ داخلہ محسن نقوی دی صدارت وزارت دے ذیلی اداریاں دے سربراہاں دا اجلاس منعقد جئیں اچ انہاں اداریاں دی کارکردگی بہتر بݨاوݨ، باہمی رابطے مضبوط کرݨ تے جدید تقاضیاں نال ہم آہنگ اصلاحات نافذ کرݨ دے پلان تے پیش رفت دا جائزہ گھدا ڳیا، سربراہاں کوں ہدایت کیتی ڳئی جو او آپݨے متعلقہ اداریاں دا ݙو سالہ جامع ٹرانسفارمیشن پلان پیش کرن۔ اجلاس اچ وزیرِ مملکت طلال چوہدری، سیکرٹری داخلہ، چیئرمین نادرا، ڈی جی ایف آئی اے، ڈی جی اے این ایف، نیشنل کوآرڈینیٹر نیکٹا تے ٻئے اعلیٰ حکام شرکت کیتی۔ وزیرِ داخلہ محسن نقوی تمام اداریاں کوں آپسی رابطے تے کوآرڈینیشن ٻئی مضبوط بݨاوݨ دی ہدایت کیتی۔ انہاں اکھیا جو وزارتِ داخلہ دا کم ٻیاں وزارتاں توں مختلف تے غیر معمولی نوعیت دا اے لہٰذا ہر ذیلی ادارے کوں مثالی تے عوام دوست بݨاوݨ اساݙا ہدف اے۔ انہاں تمام اداریاں دے سربراہاں کوں ہدایت کیتی جو او آپݨے متعلقہ اداریاں دا ݙو سالہ جامع ٹرانسفارمیشن پلان پیش کرن۔ وزیرِ داخلہ ایں ڳالھ تے زور ݙتا جو اداریاں کوں خودمختار تے بااختیار ہووݨاں چاہیدے، انہاں کوں آپݨے فیصلے خود کرݨے ہوسن اتے ہر معاملہ وزارت کوں بھیڄݨ دی ضرورت نہ ہوسی۔ انہاں آکھیا جو جتھاں ضرورت ہووے قوانین اچ ترامیم تے اصلاحات دی تجاویز فوری پیش کیتی ونڄن۔ عوام کوں بہترین سہولیات دی فراہمی تے سکیورٹی امور تے ڳالھ مہاڑ کریندے ہوئے محسن نقوی آکھیا جو تمام اداریاں دے سربراہ ڈیٹا تے سائبر سکیورٹی دے حوالے نال مؤثر تے جامع اقدامات یقینی بݨاون۔ انہاں لینڈ پورٹ اتھارٹی سمیت نویں قائم تھئے اداریاں کوں مکمل سپورٹ فراہم کرݨ دی یقین دہانی کرویندیں ہوئیں آکھیا جو تمام اداریاں کوں درکار وسائل مہیا کیتے ویسن۔ وزیرِ داخلہ نے واضح کیتا جو گزشتہ تے ایں سال حج آپریشن دے دوران منشیات سمگلنگ دا ہک وی کیس رپورٹ نہ تھیوݨ اساݙے اداریاں دی کارکردگی اچ بہتری دا واضح ثبوت اے۔ ایں موقعے تے وزیرِ مملکت طلال چوہدری آکھیا جو وفاقی اداریاں اچ کم نہ کرݨ دا کلچر ہئی لیکن اساں ایں سوچ کوں بدلیے۔ انہاں زور ݙتا جو تمام اداریاں کوں ہݨ ٹارگٹ تے مبنی، نتیجہ خیز تے کارکردگی تے مرکوز انداز اچ کم کرݨاں پوسی۔ اجلاس اچ آئی جی فیڈرل کانسٹیبلری، ڈی جی این سی سی آئی اے، ایم ڈی لینڈ پورٹ اتھارٹی، ڈی جی پاسپورٹ اینڈ امیگریشن، چیف کمشنر و آئی جی اسلام آباد پولیس، چیئرمین سوشل میڈیا ریگولیٹری اتھارٹی تے فیڈرل پراسیکیوٹر جنرل وی شرکت کیتی۔