پاکستان ترکیہ تے سعودی عرب دے نال رَل تے خطے دے دفاع تے سلامتی کوں یقینی بݨاوݨ اچ تعمیری کردار ادا کریندا راہسی، محمد شہباز شریف

اسلام آباد (اے پی پی) وزیرِ اعظم محمد شہباز شریف مکہ مکرمہ مشترکہ دفاعی معاہدے دے حوالے نال امریکی صدر ڈونلڈ ٹرمپ دی حمایت کوں سراہندے ہوئے آکھیا جو پاکستان ترکیہ تے سعودی عرب دے نال رل تے پورے خطے دے دفاع تے سلامتی کوں یقینی بݨاوݨ اچ تعمیری کردار ادا کریندا راہسی۔ سنوار کوں “ایکس” تے آپݨے سنیھے اچ وزیرِ اعظم محمد شہباز شریف اکھیا جو او صدر ڈونلڈ ٹرمپ ولوں مکہ مکرمہ مشترکہ دفاعی معاہدے تے دستخط دے حوالے نال حمایت تے حوصلہ افزائی دا شکریہ ادا کریندن۔ وزیرِ اعظم آکھیا جو برادر ملک سعودی عرب تے جمہوریہ ترکیہ دے نال رل تے پاکستان پورے خطے دے دفاع تے سلامتی کوں یقینی بݨاوݨ اچ تعمیری کردار ادا کریندا راہسی۔ انہاں آکھیا جو او ہک وار ٻیا صدر ٹرمپ دی جرأت مندانہ تے فیصلہ کن قیادت کوں خراجِ تحسین پیش کریندن جئیں جنوبی ایشیا اچ جوہری تباہی کوں ٹالݨ اتے لکھاں انسانی جاناں کوں بچاوݨ اچ مدد ݙتی، پائیدار امن ای ساݙی اقوام دے روشن تے خوشحال مستقبل کیتے سبھ توں اہم بنیادی شرط اے۔ واضح رہے جو صدر ٹرمپ آپݨے سوشل میڈیا پلیٹ فارم تے جاری بیان اچ اکھیا ہئی جو انہاں کوں ٻہوں خوشی اے جو سعودی عرب، ترکی تے پاکستان “مکہ مکرمہ مشترکہ دفاعی معاہدے” تے دستخط کر ݙتن۔ انہاں ایں کوں ٻہوں وݙا، جرأت مندانہ تے پہلا اہم قدم قرار ݙیندے ہوئیں آکھیا ہئی جو ایں معاہدے توں واضح تھیندا پئے جو مشرقِ وسطیٰ دے ممالک کینویں ہک ٻئے دے نیڑے آندے پئن اتے کینویں او آپݨا دفاع زیادہ بہتر طریقے نال کرݨ دے قابل تھیسن۔ صدر ٹرمپ ایں معاہدے تے ترکیہ، سعودی عرب تے پاکستان دی قیادت کوں مبارکباد ݙتی ہئی۔