انگلینڈ تے پاکستان وچال پہلا ٹیسٹ میچ 19 اگست توں شروع تھیسی

لندن (اے پی پی) انگلینڈ تے پاکستان دی کرکٹ ٹیماں وچال ترائے میچاں تے مشتمل سیریز دا پہلا ٹیسٹ میچ 19 اگست توں ہیڈنگلے، لیڈز وچ شروع تھیسی۔ سپورٹس ویب سائٹ دے مطابق پروفیشنل کاؤنٹی کلب سلیکٹ الیون تے پاکستان دی ٹیماں وچال ایں توں پہلے ترائے ݙینہوار وارم اپ میچ پاکستان دی ٹیم 7 وکٹاں نال جت گھدا ہئی۔ انگلینڈ تے پاکستان دیاں کرکٹ ٹیماں وچال ترائے میچاں تے مشتمل سیریز دا پہلا ٹیسٹ میچ 19 توں 23 اگست تئیں ہیڈنگلے، لیڈز وچ کھیݙیا ویسی۔ انگلینڈ دی ٹیم دی قیادت جو روٹ کریسن جݙاں جو پاکستان دی ٹیم مایہ ناز بلے باز بابر اعظم دی زیر قیادت میدان وچ لہسی۔ پاکستان دی ٹیم انہاں ݙینہاں انگلینڈ دے دورے تے اے جتھاں او میزبان ٹیم دے خلاف پریکٹس میچ دے علاوہ ترائے ٹیسٹ میچاں دی سیریز کھیݙسی۔ ترائے ݙینہوار وارم اپ میچ کھیݙیا ونڄ چکیے۔ ݙوہیں ٹیماں وچال سیریز دا ٻیا ٹیسٹ میچ 27 توں 31 اگست تئیں لارڈز وچ کھیݙیا ویسی جݙاں جو تریجھا تے چھیکڑی ٹیسٹ 9 توں 13 ستمبر تئیں برمنگھم وچ کھیݙیا ویسی۔