آزادکشمیرانتخابات اچ ن لیگ کامیاب جماعت دے طور پر سامݨے آئی ،اکثریت نال آزادکشمیراچ حکومت بݨیسوں، رانا ثناءاللہ

اسلام آباد۔17 اگست(اے پی پی) وزیراعظم دے مشیرسیاسی امور رانا ثناء اللہ اعلان کیتے جو آزاد کشمیر دے انتخابات وچ مسلم لیگ (ن) 25 نشستاں جِت تے ساریں توں وݙی جماعت بݨ تے سامݨے آئی اے تے او ݙو تہائی اکثریت نال آزاد کشمیر وچ حکومت بݨیسی۔ انہاں ݙسایا جو 53 دی اسمبلی وچ ن لیگ کوں واضح مینڈیٹ ملیے تے عوام انہاں دی تعمیر و ترقی دے وژن تے اعتماد کیتے۔پریس کانفرنس کریندے ایل اے 14 غربی باغ توں کامیاب امیدوار ساجد اقبال وی مسلم لیگ (ن) وچ شمولیت دا باقاعدہ اعلان کیتا۔ رانا ثناء اللہ آکھیے جو آزاد کشمیر وچ دھرنا ݙیوݨ آلے شہری ساݙے بھرا ہن تے ن لیگ دی حکومت انہاں دیاں محرومیاں مُکیسی۔ انہاں آکھیے جو الیکشن وچ ٹرن آؤٹ 56 فیصد ریہا تے انتخابات صاف و شفاف تھئن، جݙاں جو امن و امان پاروں 6 سیٹاں تے انتخابات کائنی تھی سڳیے۔دھاندلی دے الزامات تے ڳالھ کریندے انہاں آکھیے اعتراضات دا حل قانونی رستے نال الیکشن کمیشن کریسی۔ ن لیگ آزاد کشمیر دے صدر شاہ غلام قادر تے طارق فاروق ، ساجد اقبال دا شکریہ ادا کیتا تے ایں عزم دا اظہار کیتا جو نواز شریف دے وژن موجب سارے وسائل بروئے کار گھن آتے آزاد کشمیر دی پسماندگی دور کیتی ویسی تے عوام کوں ریلیف ݙتا ویسی