اے پی پی دے زیرِاہتمام یومِ آزادی دی مناسبت نال خصوصی تقریب، قائم مقام ایم ڈی سبین عثمان خٹک دا اے پی پی کوں مزید تکڑا تے موثر قومی ادارہ بݨاوݨ کیتے پیشہ ورانہ لگن تے اجتماعی کوششاں دی اہمیت تے زور

اسلام آباد۔18اگست(اے پی پی) قومی خبر رساں ادارے ایسوسی ایٹڈ پریس آف پاکستان اے پی پی دے زیرِاہتمام مادرِ وطن دے یومِ آزادی دی مناسبت نال خصوصی تقریب دا انعقاد کیتا ڳئے جیں وچ ملازمین ملی جوش و جذبے دا مظاہرہ کریندے محنت، ایمانداری تے پیشہ ورانہ لگن نال فرائض انجام ݙیوݨ توجہ مرکوز رکھݨ دے عزم دا اعادہ کیتا جݙاں جو قائم مقام منیجنگ ڈائریکٹر سبین عثمان خٹک ’’اے پی پی‘‘ کوں مزید تکڑا تے موثر قومی خبر رساں ادارہ بݨاوݨ کیتے اتحاد، پیشہ ورانہ سالمیت تے اجتماعی کوششاں دی اہمیت تے زور ݙتا۔

اتھاں انفارمیشن سروس اکیڈمی وچ منعقدہ یومِ آزادی دی تقریب نال خطاب کریندے قائم مقام ایم ڈی سبین عثمان خٹک آکھیے جو یومِ آزادی اساکوں قیامِ پاکستان کیتے ݙتیاں ونڄݨ آلیاں عظیم قربانیاں دی یاد ݙویندے تے ایں ڳالھ دا تقاضا کریندے جو ہر شہری اخلاص، محنت تے اپݨی پیشہ ورانہ صلاحیتاں کوں بروئے کار گھن آںدے ہوئیں ملک دی ترقی وچ کردار ادا کرے۔ انہاں اکھیا جو آزادی صرف جشن مناوݨ دا ناں نی بلکہ اپݨے اپݨے متعلقہ شعبے وچ ملک دی خدمت دیانت داری، اتحاد تے عزم دے نال کرݨ دی ذمہ واری وی اے۔ سبین عثمان خٹک آکھیے جو قومی خبر رساں ادارے دی حیثیت نال ’’اے پی پی‘‘ دی ذمہ واری اے جو عوام کوں درست، وقتی تے قابلِ اعتماد خبراں ݙیوے تے غلط اطلاعات و گمراہ کن معلومات دے کھنڈݨ کوں روکݨ وچ موثر کردار ادا کرے۔ قائم مقام ایم ڈی ’’اے پی پی‘‘ ملازماں دی فلاح و بہبود سانڳے کیتے ڳئے اقدامات دا ذکر کریندے ݙسایا جو بورڈ آف ڈائریکٹرز اپݨے اڄوکے اجلاساں وچ تنخواہیں تے مراعات وچ مجموعی طور تے 112 فیصد ودھارے دی منظوری ݙتی اے۔ انہاں ݙسایا جو معذوری الاؤنس ودھا تے 10 ہزار روپے کرݨ دی وی منظوری ݙتی ڳئی اے جݙاں جو ملازمین کوں مزید مالی ریلیف ݙیوݨ کیتے وزارتِ اطلاعات و نشریات تے وزارتِ خزانہ دے تعاون نال اقدامات کیتے کوشاں ہیسے۔ سبین عثمان خٹک آکھیے جو ’’اے پی پی‘‘ ہک ٹٻر وانڳوں اے، ایں کیتے ملازمین کوں ہک ٻئے دا احترام، اپݨے ساتھیاں دی معاونت تے اجتماعی طور تے اڳوں ودھݨ دا عزم کرݨا چاہیدے۔ انہاں اقلیتی ملازماں کوں ہکو جیہے موقع ݙیوݨ دے ادارے دے عزم دا اعادہ کریندے آکھیا جو ’’اے پی پی‘‘ وچ اقلیتی برادریاں دے مذہبی تہوار وی باقاعدگی نال منائے ویندن جنہاں وچ کرسمس وی شامل اے۔ تقریب دے دوران وزارتِ اطلاعات و نشریات دے سیکرٹری اشفاق احمد خلیل، پرنسپل انفارمیشن افسر رئیسہ عادل تے قائم مقام ایم ڈی سبین عثمان خٹک دے یومِ آزادی دے حوالے نال ویڈیو پیغامات وی ݙکھائے ڳئن۔ تقریب وچ نعمان عادل، ناہید تاج تے عبدالرحمان ملی نغمے پیش کیتے جݙاں جو قاسم ملک نعتِ رسولِ مقبول ﷺ پیش کیتی۔ مختلف علاقائی زباناں وچ وی یومِ آزادی دے پیغامات پیش کیتے ڳئے۔ ڈائریکٹر کاشف رضوی اردو،

ڈائریکٹر شوکت چانڈیو سندھی، ثمینہ چوہدری پنجابی، فرحت اللہ خٹک تے ڈاکٹر واحد اللہ ایوب پشتو، رخشندہ تاج بلوچی جݙاں جو ڈاکٹر سعدیہ کمال سرائیکی وچ یومِ آزادی دے حوالے نال اپݨے پرجوش جذبات دا اظہار کیتا۔

تقریب دی نظامت شمائلہ نورین تے صنم جونیجو کیتی۔ تقریب وچ ڈائریکٹر نیوز شمائلہ عندلیب، ڈائریکٹر اردو نیوز سروس عبدالجبار ذکریا، ڈائریکٹر ویڈیو نیوز رب نواز باجوہ، انفارمیشن افسران عدنان اکرم باجوہ تے فارینہ مغل سودھے ’’اے پی پی‘‘ دے ملازمین ٻہوں وݙی تعداد وچ شرکت کیتی۔ تقریب دے چھیکڑ تے قائم مقام منیجنگ ڈائریکٹر سبین عثمان خٹک ’’اے پی پی‘‘ دے مختلف شعبیں نال تعلق رکھݨ آلے ملازمین دے رلے یومِ آزادی دا کیک کٹیا۔