اپوزیشن یکسوئی پیدا کرے، وزیراعظم دی مذاکرات دی دعوت اڄ وی برقرار اے، ڈاکٹر طارق فضل چوہدری

اسلام آباد۔18اگست (اے پی پی) وزیرِ پارلیمانی امور ڈاکٹر طارق فضل چوہدری آکھیے جو اپوزیشن یکسوئی پیدا کرے، وزیراعظم دی مذاکرات دی دعوت اڄ وی برقرار اے، ملک وچ امن، استحکام تے پارلیمانی نظام دی مضبوطی دا واحد رستہ مذاکرات تے سانجھی ڳالھ مہاڑ اے۔سینیٹ  اجلاس وچ سینیٹر محسن عزیز دی طرفوں چاتے ڳئے نکات تے اظہارِ خیال کریندے ڈاکٹر طارق فضل چوہدری آکھیا جو اپوزیشن کوں اپݨے اندر یکسوئی پیدا کرݨی چاہیدی اے، کیوں جو جنہاں مسئلیں دا اڄ ایوان وچ ذکر کیتا ویندا پئے، انہاں دی نشاندہی حکومت ہک سال پہلے وی کر چکی ہئی تاں جو اپوزیشن دی صفاں وچ تقسیم پاروں انہاں معاملیں تے پیش رفت نی تھی سڳی، اپوزیشن خود کہیں ہک نقطے تے متفق نی تھی سڳدی پئی۔ انہاں اکھیا جو موجودہ سیاسی صورتحال وچ مسئلیں دا واحد حل مذاکرات تے پارلیمانی طریقہ کار دے ذریعے کڈھیا ونڄ سڳدے۔ ڈاکٹر طارق فضل چوہدری ݙسایا جو اڄوکے سال بجٹ اجلاس دے دوران وزیراعظم اپوزیشن اتحاد کوں مذاکرات دی دعوت ݙتی ہئی۔ ایں دے بعد حکومت دی طرفوں پارلیمانی امور متعلق مشیر رانا ثناء اللہ تے ٻئے رہنما اپوزیشن لیڈر دے چیمبر وچ وی ڳئے، جتھاں ڳالھ کیتے جاہ تے طریقہ کار تے مشاورت تھئی۔ انہاں اکھیا جو حکومت سپیکر چیمبر وچ ملاقات دی پیشکش کیتی تان جو ایں تے اتفاق نہ تھی سڳیا۔ بعد اچ اپوزیشن کوں آکھیا ڳیا جو او پارلیمنٹ ہاؤس دے اندر اپݨی پسند دی جاہ تجویز کرے تاں جو وزیراعظم تے اپوزیشن رہنما ٻہہ تے سارے مسئلیں تے کھل تے ڳالھ کرسڳن۔ طارق فضل چوہدری آکھیا جو حکومت مذاکرات کیتے کوئی پیشگی شرطاں یا ایجنڈا مقرر نی کیتا۔ اپوزیشن جیں وی موضوع تے ڳالھ کرݨ چاہوے، حکومت ایں تے ڳالھ کیتے تیار اے۔ انہاں آکھیا جو وزیراعظم تے انہاں دی ٹیم نہ صرف اپوزیشن دا موقف خندہ پیشانی نال سݨسن بلکہ مسئلیں دے حل کیتے عملی اقدامات دی وی کوشش کریسن۔ انہاں واضح کیتا جو وزیراعظم دی طرفوں ݙتی ڳئی مذاکرات دی دعوت ہݨ وی برقرار اے تے ایں دی مدت ختم نی تھئی۔ انہاں اپوزیشن رہنماواں، خصوصاً اپوزیشن لیڈر سودھے ٻئے پارلیمانی رہنماواں تے زور ݙتا جو او ویلھا تے مقام دا تعین کرن تاں جو مذاکرات دا عمل اڳوں ودھ سڳے۔ ڈاکٹر طارق فضل چوہدری آکھیا جو روزانہ ایوان دی کارروائی معطل کر تے طویل تقریراں کرݨ نال مسئلے حل نہ تھیسن، سیاسی اختلافات دے باوجود پارلیمنٹ ہی مسئلیں دے حل دا موثر فورم اے تے سارے فریقاں کوں ڳالھ دے ذریعے اڳوں ودھݨا چاہیدے۔