حکومت کیش لیس معیشت دے قیام کیتے ٹیکنالوجی اتے مالی خدمات دے انضمام تے یقین رکھدی اے: عطاء اللہ تارڑ

اسلام آباد۔17 اگست(اے پی پی)وفاقی وزیرِ اطلاعات و نشریات عطاء اللہ تارڑ آکھیے جو حکومت مالی شمولیت دے ودھارے، شفافیت کوں یقینی بݨاوݨ اتے کیش لیس معیشت دے قیام کیتے ٹیکنالوجی اتے مالیاتی خدمات دے انضمام تے یقین رکھدی اے، حکومت دا وژن شہریاں کوں جدید ٹیکنالوجی تے مبنی آسان، قابلِ رسائی اتے مربوط مالیاتی خدمات دی فراہمی اے، زندگی، زونگ اتے جے ایس بینک دا زیڈ والٹ اقدام ایں وژن دے تحت مالی شمولیت کوں عام شہریاں تک وسعت ݙیوݨ اتے ٹیلی کام، ٹیکنالوجی اتے انٹرنیٹ بینکنگ کوں یکجا کرݨ کیتے ہک اہم پیشرفت اے۔ اسلام آباد اچ”زندگی، زونگ اتے جے ایس بینک“ دی ساڄھے داری نال ”زیڈ والٹ“دی تقریب نال خطاب کریندے وفاقی وزیرِ اطلاعات ٹیلی کام کمپنی زونگ کوں مختلف شعبیاں وچال اشتراک اتے باہمی تعاون دی بہترین مثال قائم کرݨ تے مبارکباد ݙتی۔ انہاں اکھیا جو حکومتِ پاکستان مالی شمولیت دے ودھارے اتے یقین رکھدی اے۔ وزیراعظم محمد شہباز شریف کیش لیس معیشت دے ودھارے کیتے نہ صرف اعلیٰ سطح کمیٹی ٻݨائی اے ٻھل ٹیکنالوجی دے انضمام اتے کیش لیس معیشت دی اڳونہی دی آپ قیادت کریندے پئن تاں جو شفافیت اتے مالی شمولیت کوں یقینی بݨایا ونڄ سڳے۔ انہاں اکھیا جو وزیراعظم محمد شہباز شریف ایں کمیٹی دی صدارت آپ ایں کیتے سنبھالی جو او ٹیکنالوجی تے یقین رکھدن اتے انہاں دا وژن اے جو شہریاں کوں ݙتیاں ونڄݨ والیاں مالیاتی خدمات جدید ٹیکنالوجی نال ہم آہنگ اتے ٹیکنالوجی تے مبنی ہووݨیاں چاہیدن۔ وفاقی وزیر آکھیا جو وزیراعظم محمد شہباز شریف بطور وزیراعلیٰ پنجاب اپݨے دور اچ پہلا آئی ٹی بورڈ ٻݨایا ڄیکوں اڄ پنجاب آئی ٹی بورڈ دے ناںا نال ڄاݨیا ویندے اتے اے ٹیکنالوجی تے مبنی سرکاری شعبے دا پہلا ادارہ ہئی۔ انہاں اکھیا جو ہک اینڄھے ویلھے جݙاں ویڈیو کانفرنسنگ دی سہولت عام نہ ہئی، اساں سبھ کورونا دے ݙینہاں اچ زوم ایپلی کیشن نال متعارف تھئے، ایں ویلھے شہباز شریف بطور وزیراعلیٰ پنجاب سرکاری شعبے اچ پہلی ویڈیو کانفرنسنگ سروس متعارف کرائی تاں جو بہاولپور، ڈیرہ غازی خان اتے ملتان سودھا پنجاب دے دور دراز علاقیاں اچ تعینات افسران کوں اجلاساں اچ شرکت کیتے لاہور دا لمبا سفر نہ کرݨا پووے۔ انہاں آکھیا جو انہاں اقدامات نال ٹیکنالوجی دا فروغ، شمولیت اتے کارکردگی اچ اضافے دا سفر شروع تھیا ٻھل ٹیکنالوجی دے فروغ دا اے عمل صرف انہاں اقدامات تک محدود نئیں رہیا۔ انہاں آکھیا جو میرٹ تے لیپ ٹاپ ونݙݨ دا فلیگ شپ منصوبہ متعارف کرایا ڳیا تاں ایںدے تے وی ٻہوں تنقید تھئی ٻھل کورونا وباء اچ ملکی معیشت دے استحکام اچ ایں ٹیکنالوجی اہم کردار ادا کیتا، ٻہوں وݙی تعداد اچ لوکاں گھراں توں کم کیتا جݙاں جو طلبہ آن لائن تعلیم حاصل کیتی، ایں تناظر اچ ٹیکنالوجی دے فروغ دے موجودہ دور اچ اینڄھے اقدامات ݙاݙھے خوش آئند ہین۔ وفاقی وزیر آکھیا جو حکومتِ پاکستان زیڈ والٹ اقدام دی مکمل حمایت کریندی اے، ٹیکنالوجی اتے مالی شمولیت کوں یکجا کریندے ہوئے شہریاں کیتے مالیاتی خدمات تک رسائی اتے ایں عمل اچ شمولیت کوں سوکھا ٻݨاوݨ ویلھے دی وݙی لوڑھ اے، اے ہک بہترین اقدام اتے شاندار شراکت داری اے۔ انہاں وزیراعظم اتے حکومتِ پاکستان ولوں یقین ݙوایا جو جتھاں وی ٹیکنالوجی متعارف کراوݨ تے مختلف صنعتاں دے اشتراک نال مالی شمولیت کوں فروغ ݙیوݨ دی کوشش ہوسی، حکومتِ پاکستان انہاں اقدامات دی بھرپور حمایت کریسی۔ انہاں زندگی، زونگ اتے جے ایس بینک دے اشتراک کوں سراہندے آکھیا جو زیڈ والٹ دا آغاز مالی شمولیت دے فروغ اتے شہریاں کیتے مالیاتی خدمات کوں آسان بݨاوݨ کیتے اہم قدم اے۔ عطاء اللہ تارڑ آکھیا جو کیش لیس معیشت دے حوالے نال ’’زیڈ والٹ‘‘ دے اقدام کوں اآقونہا کیتا ویسی تاں جو ٻئے ادارے اتے شعبے وی ایں مثال دی پیروی کر سڳن۔