جئیں تہذیب دنیا دی رہنمائی کیتی او اڄ ٻنہاں دی محتاج کیوں، اساکوں آپݨی عظیم علمی روایت کوں زندہ کرݨا پوسی: پروفیسر احسن اقبال

اسلام آباد (اے پی پی) وفاقی وزیر برائے منصوبہ بندی، ترقی تے خصوصی اقدامات پروفیسر احسن اقبال آکھیا جو مسلماناں ہک زمانے وچ علم، تحقیق تے سائنسی جستجو وچ دنیا دی قیادت کیتی، جئیں تہذیب دنیا دی رہنمائی کیتی او اڄ ٻنہاں دی محتاج کیوں، اساکوں آپݨی عظیم علمی روایت کوں زندہ کرݨا پوسی۔ اے ڳالھیں انہاں وزارتِ منصوبہ بندی، ترقی تے خصوصی اقدامات وچ محفلِ میلاد النبی ﷺ نال خطاب کریندیں ہوئیں کیتا۔ انہاں آکھیا جو بغداد تے اندلس دے علمی مراکزی، رصد گاہواں تے مسلم سائنس داناں فلکیات، طب، ریاضی، کیمیا تے ٻئے علوم وچ تحقیق دی نویاں راہواں کھولیاں، مسلماناں دی اے علمی ترقی محض اتفاق نہ ہئی بلکہ قرآنِ کریم دی ایں بنیادی دعوت نال ڳنڈھئی ہوئی ہئی جئیں وچ انسان کوں کائنات وچ اللہ تعالیٰ دی نشانیاں دا مشاہدہ، عقل دا استعمال تے غور و فکر کرݨ دی ولا ولا ترغیب ݙتی ڳئی اے۔ پروفیسر احسن اقبال اکھیا جو اڄ کائنات دی ابتدا تے ایں دے اسرار جاݨݨ کیتے جیمز ویب سپیس ٹیلی سکوپ سویں جدید سائنسی منصوبے انسانی جستجو، تحقیق تے کائنات کوں سمجھݨ دی کوشش دی علامت ہن، اساکوں سوچݨا ہوسی جو ساݙی علمی تے سائنسی روایت کتھاں کمزور تھئی تے اساں تحقیق تے دریافت دے میدان وچ پچھوں کیوں رہ ڳئے ہیسے؟