ہنر مند تے باصلاحیت جواناں کوں باعزت روزگار دی فراہمی حکومت دی اولین ترجیح اے: محمد شہباز شریف

اسلام آبادـ 18 اگست(اے پی پی) وزیراعظم محمد شہباز شریف آکھیا جو ہنر مند تے باصلاحیت جواناں کوں باعزت روزگار دی فراہمی حکومت دی اولین ترجیحاں اچ شامل اے، نیشنل یوتھ ایمپلائمنٹ پالیسی دے تحت ملک دے لمبائی تے چوڑائی بالخصوص بلوچستان تے خیبر پختونخوا دے جواناں کوں روزگار دے موقع فراہم کرݨ تے خصوصی توجہ دی ضرورت اے۔ منگل کوں پی ایم آفس دے میڈیا ونگ توں جاری بیان دے مطابق وزیراعظم محمد شہباز شریف آپݨی صدارت نیشنل یوتھ ایمپلائمنٹ پالیسی تے عملدرآمد بارے جائزہ اجلاس وچال اے ڳالھیں کیتی۔ وزیراعظم ہدایت کیتی جو نیشنل یوتھ ایمپلائمنٹ پالیسی دے تحت جواناں کوں روزگار دے موقع مہیا کرݨ کیتے مربوط تے موثر اقدامات یقینی بݨائے ونڄن، نیشنل یوتھ ایمپلائمنٹ پالیسی دی عملدرآمد تے پیشرفت دا جائزہ اجلاس ہر مہینے تھیسی، ملک دے ہنر مند تے باصلاحیت جواناں کوں باعزت روزگار دی فراہمی حکومت دی اولین ترجیحاں وچ شامل اے۔ وزیراعظم اکھیا جو حکومت ولوں ملک دی پہلی نیشنل یوتھ ایمپلائمنٹ پالیسی دا اجرا ساݙی پرخلوص کوششاں دا عکاس اے، نیشنل یوتھ ایمپلائمنٹ پالیسی دے تحت اقدامات کیتے بین الوزارتی تعاون تے جامع حکمتِ عملی ناگزیر اے، قوم دے جواناں بالخصوص خواتین دے روزگار دے نویں موقعیاں اچ شمولیت یقینی بݨاوݨ کیتے انہاں کوں ہنر مند بݨاوݨ تے خصوصی توجہ ݙتی ونڄے۔ وزیراعظم اکھیا جو نیشنل یوتھ ایمپلائمنٹ پالیسی دے تحت ملک دے لمبائی تے چوڑائی بالخصوص بلوچستان تے خیبر پختونخوا دے جواناں کوں روزگار دے موقع فراہم کرݨ تے خصوصی توجہ دی ضرورت اے، ملک دی ہنر مند افرادی قوت کوں اندرون تے بیرونِ ملک تجارتی تے صنعتی ڈیمانڈ دے نال ہم آہنگ کرݨ کیتے نیوٹک تے سمیڈا وچ ادارہ جاتی اصلاحات کیتیاں ڳئن۔ وزیراعظم ایں پالیسی دی بدولت جواناں کوں حاصل تھیوݨ آلے فائدیاں دے حوالے نال آگاہی مہم دی ہدایات جاری کیتی۔ اجلاس کوں ݙسیا ڳیا جو نیشنل ووکیشنل اینڈ ٹیکنیکل ٹریننگ کمیشن افرادی قوت کیتے خصوصی طور تے بین الاقوامی سرٹیفیکیشن تے مطلوبہ زبان تے مہارت کیتے وی خصوصی اقدامات کریندا پئے، جواناں کوں بیرونِ ملک روزگار فراہم کرݨ کیتے مارکیٹ دی ڈیمانڈ دے مطابق تربیت ݙتی ویندی پئی اے، حکومتی اقدامات پاروں ڈیجیٹل یوتھ ہب دے توسط نال ملک دے جواناں کوں ہک پلیٹ فارم اتے اندرونی تے بیرونِ ملک روزگار دے موقعیاں دی تفصیلات فراہم کیتیاں ویندی پئن، نیشنل یوتھ ایمپلائمنٹ پالیسی تے موثر عملی اقدامات کیتے تمام وزارتاں تے متعلقہ ادارے آپسی تعاون تے مشاورت نال کم کریندے پئن، تعلیمی اداریاں وچ یوتھ ڈویلپمنٹ سیلز قائم کیتے ویندے پئن جیڑھے جواناں دی رہنمائی تے کیریئر کاؤنسلنگ دے نال نال انہاں کوں روزگار تے ہنرمندی دے موقعیاں توں آگاہ کریسن۔ اجلاس وچ پرائم منسٹر یوتھ پروگرام دے چیئرمین رانا مشہود احمد خان وزیراعظم دی ہدایت دے مطابق کیتے ڳئے اقدامات تے بریفنگ ݙتی۔ اجلاس وچ نائب وزیراعظم تے وزیرِ خارجہ محمد اسحاق ڈار، وفاقی وزیرِ منصوبہ بندی تے ترقی احسن اقبال، وفاقی وزیرِ اقتصادی امور احد خان چیمہ، وفاقی وزیرِ اطلاعات تے نشریات عطاء اللہ تارڑ، وفاقی وزیرِ موسمیاتی تبدیلی مصدق ملک، وفاقی وزیرِ انفارمیشن ٹیکنالوجی شزا فاطمہ خواجہ، چیئرمین وزیراعظم یوتھ پروگرام رانا مشہود احمد خان تے ٻئے متعلقہ سرکاری اداریاں دے افسراں شرکت کیتی۔