فضائی آلودگی تے قابو پاوݨ کیتے قومی سطح تے سانجھیاں کوششاں ناگزیر ہن، ڈاکٹر مصدق ملک

اسلام آباد۔18اگست (اے پی پی) وفاقی وزیرموسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو فضائی آلودگی انسانی صحت کیتے ہک وݙا چیلنج اے جیں تے قابو پاوݨ کیتے قومی سطح تے مشترکہ تے مربوط کوششاں ناگزیر ہن، حکومت ملک وچ الیکٹرک گاݙیاں دے ودھارے کیتے اقدامات کریندی پئی اے جیڑھے فضائی آلودگی وچ گھٹکی گھن آوݨ وچ اہم کردار ادا کرسڳدن۔ اے ڳالھ انہاں پاکستان نیشنل کلین ایئر پالیسی دے عملدرآمدی منصوبے بارے ہک ݙینھ دی اعلیٰ سطحی تقریب توں بطور مہمانِ خصوصی خطاب کریندے آکھی ۔ اے تقریب وزارت موسمیاتی تبدیلی و ماحولیاتی ہم آہنگی، پاکستان انوائرنمنٹل پروٹیکشن ایجنسی (پاک ای پی اے) اسلام آباد تے ایشیائی ترقیاتی بینک دے سانجھے تعاون نال منعقد تھئی۔ تقریب توں خطاب کریندے وفاقی وزیرآکھیا جو صاف ہوا ہر شہری دا بنیادی حق اے جݙاں جو فضائی معیار کوں بہتر بݨاوݨ کیتے موثر نگرانی، پالیسیاں تے سختی نال عملدرآمد تے سارے متعلقہ شعبیں وچ اصلاحات ضروری ہن۔ انہاں اکھیا جو صاف ہوا دے حصول کیتے صنعت، ٹرانسپورٹ تے توانائی دے شعبیں وچ موثر اصلاحات کرݨیاں ہوسن۔ انہاں آکھیا جو فضائی آلودگی وچ گھٹکی کیتے جدید ٹیکنالوجی توں استفادہ تے صاف توانائی دا ودھارا ویلھے دی اہم لوڑھ اے ۔ ڈاکٹر مصدق ملک آکھیا جو حکومت ملک وچ الیکٹرک گاݙیاں دے ودھارے کیتے اقدامات کریندی پئی اے جیڑھے فضائی آلودگی وچ گھٹکی گھن آوݨ وچ اہم کردار ادا کرسڳدن۔ وفاقی وزیر آکھیا جو ماحولیاتی تحفظ صرف حکومت دی ذمہ واری نی بلکہ معاشرے دے سارے طبقے کوں ایں حوالے نال آپݨا کردار ادا کرݨا ہوسی، صاف ہوا تے بہتر ماحول کیتے عوامی شعور اجاگر کرݨ وی ساݙی سانجھی ذمہ واری اے۔ انہاں ایں عزم دا اظہار کیتا جو آوݨ آلیاں نسلاں کیتے صاف، محفوظ تے صحت مند ماحول یقینی بݨاوݨ کیتے سارے ممکنہ اقدامات جاری رکھئے ویسن۔ ڈاکٹر مصدق ملک آکھیا جو ماحولیاتی پالیسی دا اصل مقصد صرف پالیسی بݨاوݨ نی بلکہ ایں دے عملی فیدے عوام تئیں پڄاوݨ اے، ماحول دے تحفظ دا بنیادی مقصد انسانی زندگی دا تحفظ اے۔ وفاقی وزیر آکھیا جو تحفظِ ماحول دے حوالے نال کیتے ڳئے اقدامات، موجودہ پالیسی تے ایں دے نفاذ وچ درپیش مسئلیں توں متعلقہ ماہرین انہاں توں کتھائیں ودھ بہتر طور تے آگاہ ہن۔ ڈاکٹر مصدق ملک آکھیا جو موجودہ پالیسی وچال سامݨے آوݨ آلیاں تبدیلیاں تے مسئلیں دی نشاندہی دے نال انہاں دے ممکنہ حل وی ماہرین ہی بہتر طور تے تجویز کرسڳدن، لوڑھ ایں ڳالھ دی اے جو پالیسی وچ ضروری تبدیلیاں کیتیاں ونڄن تے دستیاب پالیسی فریم ورک کوں زیادہ موثر انداز وچ استعمال کیتا ونڄے۔ انہاں آکھیا جو ماحولیاتی تحفظ کہیں ہک ادارے یا حکومت دی ذمہ واری نی بلکہ معاشرے دے سارے طبقے دی مشترکہ ذمہ واری اے۔ این جی اوز تے ماحولیاتی شعبے نال وابستہ ٻہوں سارے لوکاں آپݨیاں زندگیاں ماحول، آب و ہوا، صاف ہوا تے قدرتی وسائل دے تحفظ کیتے وقف کر رکھیاں ہن۔ وفاقی وزیر اکھیا جو ٻہوں عرصے توں جاری انسانی سرگرمیاں دے نتیجے وچ پیدا تھیوݨ آلی آلودگی تے ماحولیاتی مسئلیں دا ازالہ اساں ساریں دی ذمہ واری اے۔ فضائی آلودگی انسانی صحت تے براہِ راست اثر انداز تھیندی پئی اے تے ایں دے نتیجے وچ دل تے پھیپھڑیں دیاں بیماریاں سودھے ٻہوں صحت دے مسئلے جنم گھندے پئن۔ ڈاکٹر مصدق ملک ہک ذاتی واقعے دا حوالہ ݙیندے آکھیا جو کجھ عرصہ پہلے او ہک ایجھے شخص دے نال ہسپتال وچ موجود ہن جیڑھا بے ہوش تے زندگی دے آخری مرحلے وچ ہئی، ایں موقع تے انہاں دے دل وچ اے خواہش پیدا تھئی جو کاش انہاں کوں ایں شخص دے نال صرف ہک ݙینھ مزید گزارݨ دا موقع مل ونڄے تاں جو او زندگی وچ رہ ونڄݨ آلیاں ساریاں ڳالھیں ایں کوں آکھ سڳن، بعد اچ جݙاں انہاں ہک رپورٹ وچ پڑھیا جو فضائی آلودگی انسانی زندگی دے کئی سال گھٹ کرسڳدی اے تاں انہاں کوں اوہو بندہ یاد آیا جیڑھا ایں ویلھے ہسپتال وچ مشین دے ذریعے ساہ گھندا پیا ہئی تے زندگی تے موت دی کشمکش وچ مبتلا ہئی۔ وفاقی وزیر آکھیا جو ایجھے لوک صرف ہک کائنی بلکہ ساݙے شہراں وچ ہزاراں تے ملک بھر وچ لکھاں لوک فضائی آلودگی تے ماحولیاتی مسئلیں دے اثرات برداشت کریندے پئن، ٻال، جوان، بزرگ تے معاشرے دا ہر فرد آلودہ ماحول توں متاثر تھی سڳدے۔ انہاں آکھیا جے اساں ماحول کوں بہتر بݨیندوں تاں دراصل صرف ماحول کوں نی بچیندے پئے ہوندے بلکہ انسانی زندگیاں کوں محفوظ بݨیندے پئے ہوندوں، ایہا بنیادی نکتہ ساݙی ماحولیاتی پالیسی، ترجیحات تے عملی اقدامات دا مرکز ہوݨا چاہیدے۔ ڈاکٹر مصدق ملک ایں عزم دا اظہار کیتا جو ماحولیاتی مسئلیں نال نبڑݨ کیتے پالیسی سازی دے نال نال ایں دے موثر نفاذ، ماہرین دی مشاورت تے عملی اقدامات تے خصوصی توجہ ݙیوݨی ہوسی تاں جو صاف تے محفوظ ماحول یقینی بݨایا ونڄ سڳے۔