آپریشن ردالفتنہ-3 دے تحت بلوچستان دے مختلف علاقیں وچ دہشت گرداں دے خلاف سکیورٹی فورسز دیاں کامیاب کارروائیاں جاری، 9 توں ودھ دہشت گرد جہنم واصل

اسلام آباد۔18اگست (اے پی پی) آپریشن ردالفتنہ-3 دے تحت بلوچستان دے مختلف علاقیں وچ دہشت گرداں دے خلاف سکیورٹی فورسز دیاں کامیاب کارروائیاں جاری ہن، سکیورٹی فورسز دے زیارت، ہرنائی تے سوراب وچ دہشت گرداں دے خلاف انٹیلی جنس بیسڈ آپریشن وچال 9 توں ودھ دہشت گرد جہنم واصل تھی ڳئن۔ سکیورٹی ذرائع موجب سکیورٹی فورسز خفیہ اطلاع تے زیارت تے ہرنائی وچال پہاڑی سلسلے وچ وݙا انٹیلی جنس بیسڈ آپریشن کیتا۔ سکیورٹی فورسز دہشت گرداں دے ٹھکاݨے کوں ولا ݙے تے موثر انداز وچ نشانہ بݨایا جیں وچ 8 دہشت گرد ہلاک تھئن۔ سکیورٹی ذرائع موجب انٹیلی جنس بیسڈ آپریشن وچال سکیورٹی فورسز دہشت گرداں دے ٹھکاݨے کوں وی تباہ کرݙتے۔ ضلع سوراب دے علاقے حاجیکہ وستی وچ کامیاب آپریشن وچال ہک دہشت گرد جہنم واصل تھیا۔ سکیورٹی فورسز دشت کٹائی تے حاجیکہ وچال موثر ناکہ بندی کیتی تے دہشت گرداں دی نقل و حرکت دا سراغ لاتا۔ ہلاک دہشت گرداں دے قبضے توں ایمونیشن، میگزین، دستی بم، واکی ٹاکی، موٹرسائیکل تے ٻیا سامان برآمد کر ڳھدا ڳئے۔ سکیورٹی ذرائع آکھیے جو سکیورٹی فورسز بلوچستان وچ دہشت گردی دے مکمل خاتمے تے دیرتئیں امن دے قیام تئیں بلا تعطل آپݨیاں کارروائیاں جاری رکھݨ دے عزم تے قائم ہن۔