نام نہاد آپریشن سندورتے بݨائی ڳئی بھارتی ڈاکومنٹری حقائق دی بجائے ڈرامائی تشکیل، جذباتی بیانیے تے بالی ووڈ طرز دی منظرکشی تے مبنی اے، آئی ایس پی آر

راولپنڈی۔18اگست (اے پی پی) پاک فوج دے شعبہ تعلقاتِ عامہ (آئی ایس پی آر) آکھیے جو معرکہ حق کوں ہک سال توں ودھ عرصہ گزرݨ دے باوجود بھارت زمینی حقائق تسلیم کرݨ توں انکاری اے، نام نہاد آپریشن سندورتے بݨائی ڳئی بھارتی ڈاکومنٹری حقائق دی بجائے ڈرامائی تشکیل، جذباتی بیانیے تے بالی ووڈ طرزدی منظرکشی تے مبنی اے، کہیں وی آندی بھارتی فوجی مہم جوئی دا تکڑا، فیصلہ کن تے غیرمتناسب جواب ݙتا ویسی۔ آئی ایس پی آر توں جاری بیان موجب نام نہاد آپریشن سندور تے بݨائی ڳئی بھارتی ڈاکومنٹری حقائق دی بجائے ڈرامائی تشکیل، جذباتی بیانیے تے بالی ووڈ طرز دی منظرکشی تے مبنی اے، منتخب انٹرویوزتے سینماٹک ری کنسٹرکشن دے ذریعے آپریشنل حقائق تے نتیجے کوں آپݨی مرضی موجب پیش کرݨ دی کوشش کیتی ڳئی، ڈاکومنٹری وچ موجود بنیادی تضادات خود بھارتی بیانیے دی کمزوری کوں بے نقاب کریندن، بھارتی ڈاکومنٹری 16 اپریل 2025 دے آرمی چیف دے خطاب کوں 22 اپریل دے پہلگام واقعے نال جوڑ تے بے بنیاد سازشی بیانیہ گھڑݨ دی کوشش کیتی۔ بیان وچ آکھیا ڳئے جو نام نہاد آپریشن سندور دے 82 ݙینھاں بعد بھارت دا دعویٰ اے جو پہلگام دے ترائے مبینہ ذمہ وار 28 جولائی 2025 کوں مارئے ڳئے، جے مبینہ ذمہ وار 28 جولائی کوں مارئے ڳئن تاں بھارت واضح کرے جو 7 مئی 2025 کوں کئیں کوں سزا ݙیوݨ دا دعویٰ کیتا ڳیا ہئی؟ نام نہاد ’’100 فیصد مشن کامیابی‘‘ دا بھارتی دعویٰ وی آپریشنل ریکارڈ نال مطابقت نی رکھیندا۔ بیان موجب معرکہ حق وچال پاکستان دی مسلح افواج بھارتی جارحیت ناکام بݨیندے 8 بھارتی فوجی طیارے مارسٹیے، آپریشن بنیان مرصوص وچ فتح پریسیژن گائیڈڈ راکٹس تے میزائل، پاک فضائیہ دے پریسیژن ہتھیار، لانگ رینج لوئٹرنگ میونیشنز تے پریسیژن آرٹلری استعمال کیتی ڳئی، پاکستان بھارتی جارحیت دے جواب وچ 26 فوجی اہداف کوں نشانہ بݨایا جیں وچ پاکستانی شہریاں کوں نشانہ بݨاوݨ تے پاکستان وچ دہشت گردی دی پشت پناہی نال منسلک تنصیبات وی شامل ہن، بھارتی فوجی قیادت خود پاکستانی میزائل، ڈرون تے فضائی سرگرمیاں سودھے لائن آف کنٹرول تے مسلسل جھڑپاں تے بھارتی فضائی دفاعی نظام دی فعالیت دا اعتراف کریندی اے، بھارتی قیادت دے آپݨے اعترافات پاکستان دی مبینہ ’’فیصلہ کن شکست‘‘ دے بھارتی دعوے نال مطابقت نی رکھیندے۔ بیان موجب بھارتی ڈاکومنٹری خود تسلیم کریندی اے جو جنگی کارروائیاں ݙوہیں ملکاں دے ڈی جی ایم اوز دے رابطے تے سانجھے اتفاق نال بند تھیاں، امریکی سہولت کاری نال تھیوݨ آلی جنگ بندی کوں یکطرفہ بھارتی فوجی فتح قرار نی ݙتا ونڄ سڳدا، بھارت تاریخ کوں ڈی کلاسیفائی نی بلکہ آپݨی مرضی موجب بݨاوݨ دی کوشش کیتی اے، کوئی سینماٹک منظرکشی واقعات دی ترتیب، طیاریں دے ضیان ، فوجی جانی ضیان تے حقیقی عسکری کارروائیاں کوں تبدیل نی کر سڳدی۔ آئی ایس پی آر آکھیے جو پاکستان کوں معرکہ حق دے گرد مصنوعی بیانیہ بݨاوݨ دی لوڑھ کائںی، آپریشنل ریکارڈ، میدانِ جنگ دے شواہد، سفارتی رابطے تے بھارت دے آپݨے بیانات حقائق واضح کریندن، پاکستان خطے وچ امن و استحکام کیتے پرعزم اے جݙاں جو ملکی خودمختاری، علاقائی سالمیت تے قومی مفادات دے دفاع کیتے مسلح افواج مکمل تیار تے باصلاحیت اے، کہیں وی آندی بھارتی فوجی مہم جوئی دا تکڑا، فیصلہ کن تے غیرمتناسب جواب ݙتا ویسی۔